Plattdeutsche Nachrichten Plattdüütsche Narichten vun'n 23. Dezember 2024

Faeser foddert na Anslag vun Magdeburg gau scharpere Sekerheitsgesette

Magdeburg – Na den Anslag op den Wiehnachtsmarkt in de Stadt hett dat politische Oparbeiden anfungen. Binnenministersche Faeser snack sik darför ut, gau noch Plaans för Gesette för de Binnen-Sekerheit to besluten. To’n Bispill dat nee’e Bunnespolizeigesett un Plaans, na de de Sekerheitsämters in Tokunft Biller ut’n Internet dörsöken dröfft, wo Gesichter rutkennt ward, üm Verdächtige to finnen. Bi dat Angriepen mit een Auto sünd an’n Freedagabend fief Minschen üm’t Leven kamen un mehr as 200 versehrt worrn.

Polizei nimmt Mann na Drauh-Video in Bremerhaben fast

Bremerhaben – De Polizei hett an’n Abend een Mann fastnahmen. He schall in een Video in de sotschalen Nettwarke mit een Anslag op den Bremerhabener Wiehnachtsmarkt draut hebben. Dat Drauhen richt sik gegen Minschen, de südländsch utseht, heet dat in dat Video. De Kierl, de dat Video maakt hett, is gau funnen worrn, vermellt de Polizei. Dat geev keen Gefohr för de Bevölkerung. Wat nipp un nauet is to den Fall wieter noch nich vermellt worrn.

Finanzminister Kukies will Reform vun de Schullenbrems

Berlin – Bunnesfinanzminister Kukies meent, dat een Reform vun de Schullenbrems ween mutt. In de Rheinische Post snack he vun een groden Stau vun Investitschonen. Brüggs, Kinnergaarns un Scholen harrn Johrteinte ünner to wenig Geld lieden. Darüm bruukt Dütschland een Reform vun de Schullenbrems, so Kukies. Dat wöör twars nich ahn Enn Geld praatstellen, man dat wees nich mööglich, de Middel alleen dör Spaarn rantoschaffen.

4000 VW-Manager schüllt woll weniger Gehalt kregen

Wolfsburg – Bi’n Autoboer Volkswagen, de in de Kniep sitt, bestaat woll ok de Kunzernböversten bold nich mehr op ehr vullet Gehalt. Dat geiht woll üm 4000 Manager. De Johreslohn vun jem ward 2025 un 2026 üm tein Perzent inkört. In de darop folgen dree Johren is dat woll plaant, wietere Deele vun’n Lohn wegtostrieken. VW wull darto nix seggen.

Bremen hett mehr as 400-dusend Euro Hoochwaterhölp tahlt

Bremen -  Dat Land Bremen hett mehr as 400-dusend Euro an Minschen tahlt, de ünner dat Hoochwater vör een Johr lieden hebbt. De gröttste Deel vun’t Geld güng an Buern, vermellt de Lannesregeern. Een beten mehr as 100-dusend Euro hett Bremen an Privatlüüd tahlt, de vun’t Hoochwater besünners dull bedrapen weern, to’n Bispill in’n Stadtdeel Borgfeld. In Bremen sünd woll all Andrääg op Hoochwaterhölp bearbeidt, in Neddersassen aver noch nich.

Dat Weer

Un nu een Blick op dat Weer: in Bremen un Deefholt 5, in Bremerhaben 6 un op Wangerooge sünd dat opstunns 8 Graad. Hüüt gifft dat erst dicke Wulken mit Regen or Sneeregen, later treckt dat weg un Sünn un Wulken wesselt sik den Dag över af. Mag ween, un dat gifft jümmer mal Regen- or Grisselgrusselschuers. Besünners an’n Namiddag schient fakener de Sünn – bi 7 bit 8 Graad. Tokamen Nacht is dat wesselnd wulkig un dat klaart ok mal op. Toerst kann dat noch natt vun baben kamen, meist geiht dat aver dröög dör de Nacht. Dat Thermometer sackt op 6 bit 5 Graad op de Eilanden un 2 bit minus 1 Graad in’t Binnenland. Dat kann ok glatt weern. Morrn, an’n Hilligen Abend, is dat toerst noch locker wulkig un af un an schient de Sünn. An’n Vörmiddag treckt dat aver to un dat regent een beten. Woanners blifft dat ok dröög, bi 5 bit 7 Graad. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.