Plattdeutsche Nachrichten Plattdüütsche Narichten vun'n 2. September 2024

Regeernbillen in Thüringen un Sachsen ward vigeliensch

Erfurt – De AfD hett de Landdagswahl in Thüringen klaar wunnen. Tweeter is de CDU, de will aver nich mit de AfD een Koalitschon billen. Vun’t Reknen her weer för de CDU een Tohoopgahn mit BSW un Linken mööglich – man ok dat will de CDU wegen de Linken egens nich. In Sassen hett de CDU de Wahl knapp vör de AfD wunnen. Dar wöörn CDU, BSW un SPD tohhop een Regeernmehrheit hebben. In beid Lännern hebbt de Ampel-Parteien un de Linke dütlich verloorn. De FDP is in beid Landdaag nich binnen.

Ampel-Parteien nich tofreden na Landdagswahlen

Berlin – De Ampel-Parteien sünd nich tofreden na de Landdagswahlen in Sassen un Thüringen. De tweete SPD-Baas Post snack vun een Katastroph un een Slag in’t Kontor för de Ampel. FDP-Viez Kubicki hett de Koalitschon in Fraag stellt. De Regeern harr ehr Verlööf verloorn, schreev he bi X. CDU-Generalsekretär Linnemann sä, de Ampel weer mit Schuld daran, dat de AfD so stark worrn is.

Generaalstreik un Proteste In Israel

Tel Aviv – In Israel hett een Generaalstreik anfungen. Darto hebbt Gewarkschuppen, de Oppositschon un Familien vun Geiseln opropen. Se wüllt Drock op de Regeern maken, darmit de „Jo“ to een Afkamen mit de islamistisch Hamas to een Freelaten vun Geiseln ut’n Gazastriepen seggt. Nadem dat se de Lieken vun söß Geiseln in’n Gazastriepen funnen hebbt, harr dat güstern Abend de gröttsten Proteste siet Beginn vun’n Gaza-Krieg geven.

Koalitschonsutschuss hett noch keen Lösung för Finanzlock

Bremen – För dat Finanzlock in’n aktuellen Huusholt in Bremen gifft dat noch keen Lösung. Dat geiht üm tohoopnahmen mehr as 100 Millionen Euro. SPD, Gröne un Linke harrn sik güstern drapen, üm stunnenlang Raat to hollen. Se sünd op een goden Weg, sä SPD-Lannesvörsitter Wetjen. Man se bruukt mehr Tiet, meent Grönen-Baas Helsner noch. Dat nöchste Drepen is för morrn plaant.

Papenborger Meyer Warft verhannelt över Kortarbeit

Papenborg – De Meyer Warft verhannelt opstunns över Kortarbeit. Een Spreker vun de IG-Metall vermellt, Jo, dat stimmt. För 2025 un 2026 geev dat nich noog to daan för de 3000 Arbeiders. Wegen Corona un den Ukraine-Krieg ward 2026 keen Krüüzfahrtschipp aflevert.

Dat Weer

Un nu een Blick op dat Weer: op Wangerooge 18, in Bremerhaben 19, in Bremen 20 un in Deefholt sünd dat opstunns 21 Graad. Vundaag ward dat nochmal fründlich mit veel Sünnschien un een paar lockeren Wulken. Erst gegen Abend ward de Wulken dicker un an’n ehesten in’t Emsland kann dat ok schuern or grummelschuern. Woanners blifft dat meist dröög bi 24 bit 28 Graad. Tokamen Nacht kummt dat bi dicken Wulken twüschen Werser un Ems af un an to Schuern un Blitz un Donner. Dar kann orrig veel Natt vun baben kamen. Twüschen Werser un Elv is dat meist locker wulkig un klaar, darbi ok dröög. Dat Thermometer sackt op 19 bit 16 Graad. Morrn kummt dat bi mehr Wulken as Sünn, Nevel un Dunst to’n Deel to dullen Schuers un Grummelschuers. Dat ward bruttig bi 25 bit 28 Graad, an de See bi 23 bit 24 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.