Plattdeutsche Nachrichten Plattdüütsche Narichten vun'n 10. September 2024

Zig Dode na israelisch Angrepen ut de Luft

Gaza – De israelisch Luftwaff hett na egen Angaben een Kommandozentraal vun de Hamas in’n südlichen Gazastriepen angrepen. As de Armee vermellt, weern de Terroristen dar in een Teltlager in Chan Junis, wo vele geflüchtete Palästinenser ünnerbröcht weern. Bi de Attack harrn se Terroristen vun hogen Rang drapen, heet dat vun de Armee. Ut Palästina ward dargegen vermellt, dat Israel de Telte vun Flüchtlingen bombardeert hett. Darbi weern tominnst 40 Minschen üm’t Leven kamen, 60 sünd woll versehrt worrn.  

Union töövt op mehr to de Inwannerungspolitik

Berlin – De Union weet noch nich, of se an’n Namiddag bi een Drepen över Inwannerungspolitik darbi sien ward. Darachter stickt woll, dat Bunnesbinnenministersche Faeser noch nich verklaart hett, woans se dat nipp un nau henkregen will, dat an de Grenz dütlich mehr Minschen trüchwiesen ward. För de Union wees dat aver wichtig. Faeser harr güstern Kuntrullen an all dütschen Grenzen ankünnigt. Se schüllt tokamen Week anfangen un sünd op een half Johr anleggt.

Beraden över’n Huusholt fangt in’n Bunnesdag an

Berlin – In’n Bunnesdag fangt an’n Middag dat Beraden över den Huusholt för dat nöchste Johr an. De Plaan för’t Regeern sütt Utgaven vun bold 490 Milliarden Euro vör – mehr as een Teintel darvun schüllt över nee’e Schullen betahlt weern. Man dat gifft noch een Lock vun 12 Milliarden Euro. De Ampel-Koalitschon geiht darvun ut, dat dat Lock to’n groden Deel lüttjer ward, wiel Utgaven doch nich so hooch utfallt – to’n Bispill wiel Föddermiddel nich afropen ward. De Union meent, dat geiht an de Würklichkeit vörbi.

Kassendoktors wüllt Straafgebühr bi vergeten Termin

Berlin – Patschenten, de ahn Entschülligung nich to ehrn Termin bi’n Doktor kummt, schüllt in Tokunft een Straaf tahlen. Dat will de Kassenärztlich Bunnesvereenigung. Verbandsbaas Gassen seggt in de Bild-Zeitung, dat liggt an de leege Finanzlaag in velen Praxen. Erste Doktors fangt woll all an, för nich entschülligtet Fehlen 40 Euro to verlangen, verenkelt sogar bit to 100 Euro.

Bremer Senat will Aktschonsplaan för Hitten besluten

Bremen – De Senat will vundaag den Aktschonsplaan för Hitten för Bremen un Bremerhaben besluten. Op den Plaan, de buten un binnen vörliggt, steiht in 26 Punkten, wat se daan wüllt, üm Minschen beter vör de Hitt to schützen. To’n Bispill schall dat mehr Schaddenflachs op Schoolhoffs un Speelplätzen geven un bi een grode Hitten schüllt bestimmte Ruums in öffentlich Hüüs för Afköhlung sorgen. Op lange Sicht will Bremen de heele Stadt an hitten Daag köhler maken, to’n Bispill dör Bööm, Drinkbrunnen un gröne Dacks.

Dat Weer

Un nu een Blick op dat Weer: in Bremen, Bremerhaben un Deefholt 14 un op Wangerooge sünd dat opstunns 15 Graad. De Dag ward mit Wulken un korten Tieden, wo de Sünn mal schient, meist dröög. Later ward de Wulken aver dicker un Schuers treckt op, de an’n Abend ok in Bremen ankummt. Verenkelt köönt an de Nordsee ok Blitz un Donner darbi ween – bi 18 bit 19 Graad. Tokamen Nacht is de Heben faken wulkig un dat regent länger un to’n Deel ok duller. Verenkelt gifft dat ok Grummelschuers. To’n Morrn hen lockert dat an de Nordsee sinnig een beten op. Dat Thermometer sackt op 13 bit 9 Graad. Morrn treckt de Wulken mit Regen in Richt Aller af un darachter wiest sik Schuerweer mit mehr Wulken as Sünn un jümmer nee’en Schuers un Grummelschuers. Dat blifft köhl bi 14 bit 16 Graad. Dat weern de Narichten op Platt. Anja Guse hett se tohoopstellt. Op platt trechtmaakt un vörleest hett se Heidi Jürgens.