Plattdeutsche Nachrichten Plattdüütsche Narichten vun'n 10. Oktober 2024

Hurrikan Milton kummt in Florida an

Tampa – De Hurrikan „Milton“ is in de Nacht in’n US-Bunnesstaat Florida op Land drapen. In dat Flach hett he för Landünner un Stromutfälle soorgt. De US-Ämters wahrschaut vör lebensgefährlich Stormfloten. All vör sien Ankamen hett de Hurrikan Tornados utlööst. Medien vermellt all erste Dode, as een vun de Tornados an de Ostküst vun Florida een Heim för ole Lüüd drapen hett.

Bunnesverfatengericht schall afsekert weern

Berlin – De Dütsche Bunnesdag hollt vundaag to’n ersten Mal Raat över een beter Schutz vun’t Bunnesverfatengericht. Ampel un Union hebbt een gemeensam Andrag inbröcht. Se wüllt verhinnern, dat dat Gericht vun extremen Parteien stüert ward. Darto schall dat in’t Grundgesett verankert weern, wat för Regeln dar gellt un woans dat Bunnesverfatengericht nipp un nau opboot is.

Mann in Bremerhaben vör Gericht

Bremerhaben – Wiel he na een Unfall een Video vun een swar versehrte Person in’t Internet stellt hett, steiht een Mann in Bremerhaben vör dat Amtsgericht. In’n Februar harr een Bus in de Binnenstadt vun Bremerhaben een Froo överrullt un darbi swar versehrt. De Opnahmen vun de Froo schall de Mann woll nich sülfst maakt hebben, seggt de Anklaag – em ward aver vörsmieten, de dat he se in’t Nett stellt hett. Darmit harr he ünner annern gegen de Persönlichkeitsrechte verstöten.

Een Dode na Unfall mit „Lichtfahrtüüg“

Deefholt – Bi Marl in’n Landkreis Deefholt is güstern een 14-Jöhrige bi een Tosamenstötten vun vörn üm’t Leven kamen. De Deern seet as Bifohrersche in een so nöömtet „Lichtfahrtüüg“, dat ok vun jungen Lüüd, de noch nich 18 sünd, fahrn weern draff. De 16 Johr ole Fahrerin is bi den Unfall swar versehrt worrn un ok de Fahrerin vun den annern Wagen hebbt se vör Oort vun Redderslüüd versorgen müssen.

Werder Legende Dieter Burdenski is dod

Bremen – Dieter Burdenski, de langjöhrig Tormann vun Werder Bremen, is dod. Dat hett de Vereen güstern Abend vermellt. De ehemalig Football-Natschonalspeler is unvermodens in’n Öller vun 73 Johren sturven. Werder-Präsident Hess-Grunewald sä, Burdenski harr de Mannschupp twee Jahrteinte lang prägt un he höör ahn Twiefel to de gröttsten Werder-Speler vun all Tieden. He stunn tohoopnahmen 582 Mal in’t Bremer Tor.

Dat Weer

Un nu een Blick op dat Weer: in Bremen, Bremerhaben un Deefholt 13, op Wangerooge sünd dat opstunns 14 Graad. Vundaag sünd meist dicke Wulken an’n Heben. Dat is an’n Vörmiddag ok mal dröög, darachter kummt aver all nee’e Schuers. An’n Namiddag un Abend wesselt sik Sünn un Wulken af, dat kummt mal natt vun baben, is aver ok dröög – bi 14 bit 15 Graad. Tokamen Nacht sünd noch een paar Wulken un Schuers ünnerwegens. In’n Süden vun Bremen funkelt ok mal de Sterns. Dat Thermometer sackt op 6 bit 4 Graad, an de Nordsee op 10 bit 7 Graad. Morrn gifft dat in’t südliche Bremer Ümland een Mix ut Sünn un Wulken un dat is fründlich. To de Nordsee hen verdeckt fakener Wulken de Sünn un dar treckt ok een paar Schuers dör, bi 12 bit 14 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.