Plattdeutsche Nachrichten Plattdüütsche Narichten vun'n 1. November 2024

Recht to Sülvstbestimmen gellt af hüüt

Bremen: Bunnswiet gellt vun hüüt an dat nee`e Recht to Sülvstbestimmen. Dat is dormit lichter Geschlecht un Vörnamen in den Utwies ännern to laten. In de Tokunft reckt dat „to Protokoll geven“ bi`t Standesamt. Gootachten sünd nich mehr nödig. Düsse Gootachten hebbt sik för vele Minschen as eene leidige un swore Belastung anföhlt. In Bremen un Bremerhaben hebbt al 200 Minschen nee´e Papieren beandragt.

Oprümen na Unweer in Spanien geiht wieter

Valencia: In dat Rebeet vun de Katastrophe, in´t Südoosten vun Spanien, schüllt noch mehr Suldaten to Hölp kamen. De Regeerung hett ankünnigt noch mal 500 Hölpers dorto intosetten. Dat Üm- un Bi is in dat Rebeet meist nich mehr to bruken. Tominnst 158 Minschen sünd dör dat Hoochwater to Dode kamen. Ganz vele dorvun ut dat Rebeet Valencia. Man vele Minschen sünd ok noch verschütt.

Gebühren för Auto afstellen in Ollenborg willt se to´t nee´e Johr nich ropsetten

Ollenborg: De Gebühren för „Auto afstellen“ in de Binnenstadt willt se to´t nee´e Johr nu doch nich ropsetten. SPD un Gröne hebbt in´t Rat den Andrag stellt, dat plaante Ropsetten uttosetten. Se willt nu eerst aftöven wat bi de Studie ruutsuert, de ünnersöökt wat sik de Parkgebühren, de se ropp sett hebbt, op de Geschäften in de Binnenstadt utwirkt. De Gebühren hebbt se siet 2023 all tweemal hoog sett. To´t nee`e Johr schull de Bedrag egentlich vun 2,80 op 3,60 Euro hoog gahn.

Füerwehr kriegt Füer bi Spezialist för Schiller Maahrens doot

Bremen: In Burg-Grambke hett dat an´t fröhen Morrn in de böverste Etaasch vun eene Firma brennt. De Füerwehr hett mit rund 70 Hölpers dat Füer doot maakt. Eene Person hebbt se mit Verdacht op Rookgasvergiften in´t Krankenhuus bröcht. Worüm dat bi den Spezialist för Schiller, Maahrens bannt hett is noch nich klor. Op Nafraage hett dat Ünnernehmen to buten un binnen seggt, dat de Produktion nich bedropen is.

Krimi-Museum för Oostfreesland

Norden: In de Stadt in´t Kreis Aurich maakt hüüt dat oostfrees`sche Krimi-Museum op. Op 900 Quadratmetern geiht dat üm Autoren de Krimiböker schrieft, un üm ehre Geschichten ut de Gegend. Dorünner sünd Schriever as Klaus-Peter Wolf, Hans-Jörg Martin un Theodor J. Reisdorf. För Kinner gifft dat eene Utstellung rund üm de Reeg „Nordsee-Detektive“. In de letzen Johren hett sik Oostfreesland to een Schauplatz för vele Krimiromane un Krimifilme entwickelt.

Dat Weer

Un nu een Blick op dat Weer: in Nenborg 10, in Bremen 12 un in Bremerhaven un Emm sünd dat opstünns 13 Graad. Hütt is dat gries un de Wulkenfeller hangt deep. Dat kann hier un dor ok mal Sprütterregen geven, bi 13 bit 14 Graad. Tokamen Nacht hebbt wi vele dichte Wulken, de hier un dor Regen mit sik bringt. Later treckt de Wulken na Nordrhein-Westfalen af, un dat lockert an de Küst op, bi 10 bit 4 Graad. Morrn geiht dat eerst gries los. Hier un dor hebbt wi ok Nevelfeller. Vun de Elbe un de Nordsee her lockert de Wulken later op un de Sünn kummt mal dör. De Temperaturen liggt bi 9 bit 11 Graad. Sünndag fangt de Dag mit Nevel an, de sik denn aver oplööst un de Sünn lacht us denn doch noch länger an, bi 8 bit 11 Graad. Dat weren de Narichten op Platt. Tohoopstellt hett se Gabriele Intemann. Trechtmaakt un vörleest vun Antje Kruppa.