Plattdeutsche Nachrichten Plattdüütsche Narichten vun'n 4. Dezember 2024

Betrievsversammeln bi VW hett anfungen

Wulfsborg. Bi den Volkswagen-Konzern, de in de Bredullje is, löppt siet den Vörmiddag en Berievsversammeln. Bi den Termin, de nich publik is, will Konzernbaas Oliver Blume den Ünnernehmensbericht vörstellen. As Gastreedner warrt mit Bunnsarbeitsminister Hubertus Heil rekent. Ehrgüstern harrn rund eenhunnertdusend VW-Mitarbeiters bi Warnstreiks mitmakt. Dat vermellt de IG Metall. De Mitarbeiters protesteern gegen de Sporplans vun den Konzern, de ünner annern vun de Löhn thein Perzent aftrecken will.

Oppositschoon in Süüdkorea will Präsidenten wegen Oprohr verklagen

Seoul. Na dat de süüdkoreanisch Präsident Yoon Suk Yeol güstern för korte Tiet dat Kriegsrecht utropen harr, harr de Oppositschoon in´t Land en Andrag för dat Afsetten ut dat Amt stellt. Dat vermellt de Narichtenagentur AFP. De Oppositschoon künnigt bavento an, Yoon wegen Oprohr vör´t Gericht to bringen. De Präsident harr güstern för en poor Stünnen dat Kriegsrecht utropen, weer aver denn vun dat Parlament stoppt wurren. Achtergrund is en Striet över den Staats-Huushold.

Binnenminister vun de Länner snackt över Migrationspolitik

Rheinsbarg. De Binnenminister vun de Länner snackt af vundag in Brandenborg över de Asyl- un Migrationspolitik. Ok mit de Bunnsbinnenministersch Nancy Faeser warrt rekent. De Länner wüllt düütlich gegen dat Towannern gegen dat Gesetz gegenan stüern. Warrt seggt, Minschen vun de de Asylandrag aflehnt wurr, sünd mit kloren Kurs un gau in ehr Heimatlänner torüchtoföhren. De Binnensenator vun Bremen Ulrich Mäurer will ok över dat Thema Afschuven ut dat Karkenasyl snacken. Güstern harr en Karkengemeend ut de Neestadt in Bremen dat Afschuven vun en Somalier na Finnland verhinnert.

Ümfraag: Ünnernehmens ut Bremen hoolt ehr Mitarbeiters ok in de swore Tiet

Bremen. De Unsekerheiten in de Wirtschaft in dat verleden Johr hebbt sick schienbor blots en beten op de Arbeitssteden in dat Land Bremen utwarkt. Dat steiht in en Ümfraag in´n Opdrag vun de Bunnsagentur för Arbeit. Dorna kunnen de mehrsten Bedrieven de Tall vun ehr Mitarbeiters seker hollen or sogor hoochsetten. Man twee Drüttel vun de Ünnernehmen, de se fragt hebbt, hebbt an de hogen Energiekosten un knappen Rohstoffen to knappsen. Liekers hebbt blots een Viddel sien Personaal lütter makt. So steiht dat in de Ümfraag.

Magistrat stellt Plans för tweetet Sprüttenhuus in Bremerhaben vör

Bremerhaben. De Bo vun en tweetet Sprütten- un Reddungshuus in Bremerhaben nimmt Formen an. Dat schall in den Noorden vun de Stadt wassen. Över den Stand vun de Plans will de Magistrat an´n Vörmiddag informeeren. Bremerhaben rekent mit Bokosten vun rund twölf Millionen Euro. Dat betto eenzigste Sprüttenhuus steiht an de Autobahn-Tofohrtstraat Mitt. Vun hier ut brukt de Beroops-Füerwehr to lang, üm in den Noorden un Delen vun den Haven to kamen. Dat is bi en Kuntrull ruutsuert.

Dat Weer

Un nu noch en Blick op dat Weer: In Emden dree, in Bremen-Mitt veer, in Bremerhaben fief un in Ollenborg sünd dat opstunns dree Graad. Vundag stellt sick eerstmal en Mischmasch ut mal mehr mal weniger Wulken in. Af un an un hier un dor kaamt dat Natt vun baven. An´n Namiddag nehmen de drögen Afsnidden to un de Sünn kiekt fakener dör de Wulken. De Wind weiht en beten vun de westen Kant. An´n Avend dreiht he mehr na de süüdwesten Kant un warrt starker. Veer bit söven Graad stahn denn op dat Thermometer. In de Nacht is de Heven vull mit Wulken. Man dat blifft dröög. In de tweeten Nachthälft sünd nich mehr so vele Wulken an´n Heven. Hier un dor kann man de Sterns sehn. Dor kann Nevel opdükern un dat kann Frost geven, so dat dat ok glatt weern kann. De Temperaturen liggen bi plus veer bit minus een Graad. Morn treckt an´n Middag un Namiddag Regen op. An´n Avend warrt dat vun de Ems kort dröög mit velen Wulken. Later fangt dat wedder an to pladdern. Dat Thermometer wiest veer bit söss Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.