Plattdeutsche Nachrichten Plattdüütsche Narichten vun'n 2. Dezember 2024

Warnstreiks in en Reeg VW-Warken

Wolfsborg: Bi den Volkswagen-Kunzern steiht vundaag Streik an. In meist all de Warken in Düütschland hebbt de Mitarbeiders jemehr Arbeit liggen laten, so ok in Wolfborg. Opropen dorto harr de IG Metall. De Gewarkschap rekent dormit, dat de Tarifstriet so stuur warrt as bet nu noch nie bi VW. Wo se so dull in de Bredullje sünd, verlangt de Kunzern: De Lüüd schüllt teihn Perzent vun jemehren Lohn weniger kriegen. De IG Metall will mehr Geld un dat de Jobs seker sünd.

Bunnskanzler Scholz op Visiten in de Ukraine

Kiew: Dor hett keeneen mit rekent, man Bunnskanzler Olaf Scholz is in de ukrainsche Hauptstadt ankamen. Scholz sä in’t ZDF: He warrt ok mit Präsident Wolodymyr Selenskyj tohoopkamen. Ok hett de SPD-Mann künnigt maakt, Düütschland levert mehr Rüstungsworen, för sowat 650 Millionen Euro. Noch düt Johr schüllt de in de Ukraine ankamen. Russland harr de Ukraine toletzt mit kloor mehr Wucht angrepen.

Institut för Fredensforschung Sipri: Mehr Rüstungsworen verköfft

Stockholm: Rüstungskunzerne överall op de Welt hebbt verleden Johr mehr verköfft. So steiht dat in den neen Bericht vun dat Institut för Fredensforschung Sipri in Sweden binnen. De hunnert gröttsten Firmen harrn sowat 600 Milliarden Euro umsett. Dat sünd veer Perzent mehr as een Johr vörher. De Forschers seggt: Dat liggt an den Krieg in den Nehgen Oosten.

Bremer Bildungsbehöörd: Bi Striet fröher Alarm geven

Bremen: De Bremer Bildungsbehöörd will en Plaan op de Been stellen, mit den se fröher gegenanstüern köönt, wenn wat scheeflöppt. Butenunbinnen harr bi de Behöörd nafraagt. Düsse Punkt is en Deel dorvun, dat nipp un nau ankeken warrt, wat se de Rektorin vun de Grundschool Stader Straten vörsmiet. Seggt warrt: Ehre Strafen weren to streng ween. Dat ne‘e Alarmsystem schall regeln, wo faken de Schoolopsicht mit de Bedeensteten, de Öllern un de Schölers snacken schall.

Football-Bunnsliga: Eintracht Frankfort Nummer twee na Bayern München

Frankfort: In de Football-Bunnsliga blifft Eintracht Frankfort in’t Fohrwater vun Bayern München. De Hessen hebbt Heidenheim in jemehr Sünndags-Speel mit 4:0 afrüüscht. Vörher harr Mainz Hoffenheim mit 2:0 na Huus schickt. In de Düütsche Ieshockey Liga hebbt de Fishtown Pinguins wedder de Bavenhand hatt. Dütmal to Huus mit 4:1 gegen Augsborg. In de Tabell staht de Pinguins wieder an de drüdde Steed.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Nienborg 7 Graad, in Bremen sünd dat 8 un op Börkum 9 Graad. Vundaag: Vele Wulken mit blots en beten blauen Heven un Sunnschien. Vun Middag op an kann dat överall ok pladdern. Twüschendör aver ok mal en Tietlang dröög. Dat Thermometer krabbelt op 10 bet 12 Graad. De Wind dorto weiht flau oder en beten mehr vun de süüdwesten Kant, an de See ok frisch un mit deegte Böen. Tokamen Nacht: Dichte Wulken, eerst dröög, na Middernacht ok mit Schuer. Bi 6 bet 4 Graad. Morgen: En beten Sunnschien, anners dichte Wulken. Pladdern kann dat ok, an de See mehr as in’t Binnenland. Bi 6 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.