Plattdeutsche Nachrichten Plattdüütsche Narichten vun'n 29. November 2024

FDP bringt Papeer to den Utstieg ut de Ampel rut

Berlin: En konkret Papeer vun de FDP to den Utstieg ut de Ampel-Koalitschoon bringt de Böversten vun de Partei in Noot dat to verkloren. De FDP hett dat Papeer güstern rutgeven. Dorbinnen stahn Begrepen as „D-Day“ un „Feldslacht“. FDP-Präsidiumsliddmaat Marie-Agnes Strack-Zimmermann bekriddelt, de Woortwahl is „nich deenlich“. SPD-Generalsekretär Matthias Miersch verlangt, dat sik Parteibaas Christian Lindner entschülligt.

Völkermoord in den Gazastriepen

Tel Aviv: En Bericht vun de Minschenrechtsorganisatschoon Amnesty Internatschonaal kummt to den Sluss, dat Israel in den Gazastriepen Völkermoord bedrievt. Na den Bericht hett Israel mit Willen de Levensgrundlaag vun de Minschen tonichtemaakt. Na de UNO sünd twee Drüttel vun all Hüüs in den Gazastriepen to Schaden kamen or ganz twei gahn, binah 70 Perzent vun de Doden sünd Froens or Kinner.

Soltstock Gorleben warrt dichtmaakt

Gorleben: Dat Utforschenbargwark in den Soltstock Gorleben in Neddersassen warrt nu för jümmer dichtmaakt. Vun hüüt af an warrn rund 400.000 Kubikmeters Solt in de opbohrten holle Rüüm torüchbrocht. Dat warrt woll en poor Maand lang anduern. Johrteinte lang gellt Gorleben as denkboren Endlager för Atomaffall, is den aver vör veer Johrn utscheed.

Unfall in den Landkreis Rottenborg

Sottrum: Bi en Unfall op de Autobahn 1 in den Landkreis Rottenborg, is en Rullerfohrer doot blieven. Na eerste Insichten vermellt de Polizei, dat woll en Auto den Ruller tofaat kriegen hett, de 71-johrige Mann to fall kamen is un denn vun en Opliggertog överrullt wurr. De Autobahn in Fohrtrichten Bremen wurr en Tietlang dicht maakt.

Streik bi Radio Bremen

Un noch en Mellen in eegen Saak: Bi Radio Bremen löppt opstunns en Wohrschaustreik. Dorüm is dat Programm-Anbott afknappt or fallt ut. Dor achter sticken Tarifverhanneln twuschen den Gewarkschoppen, Radio Bremen un de Produkschoonsdochter Bremedia.

Dat Weer

Un nu kiekt wi op dat Weer: In Bremen hebbt wi minus 1 Graad, in Bremerhoben plus 2 Graad, in Möppen un Emm sünd dat opstunns 4 Graad. Hüüt fangt de Dag diesig un daakig an, övern Vörmiddag schuuvt sik mal de Sünn an den dicken griesig Wulken vörbi, man dat blifft dröög bi 4 bet 5 Graad in´t Binnenland un 7 Graad op de Eilannen. In de Nacht köönt wi de Steerns funkeln sehen, hier un dor is dat wedder daakig, dat blifft wiederhen dröög bi +3 Graad op de Eilannen un +1 bet -3 Graad in´t Binnenland. Morgen fangt wedder diesig un daakig an, bet to´n Middag lööst sik de Nevel aver op un denn köönt wi us op en fründlichen Dag freun mit Sünnenschien un en poor lütten Wulken. Dorto blifft dat överall dröög. Dat Thermometer wiest us 4 bet 6 Graad. An Sünndag eerst daakig un denn wedder Sünnenschien mit en poor Wulken un dat blifft wedder dröög bi 4 bet 6 Graad.

Dat weren de Plattdüütschen Narichten. Tohoopstellt vun Elke Küster. Op platt torechtmaakt un vörleest vun Martina Brünjes.