Plattdeutsche Nachrichten Plattdüütsche Narichten vun'n 3. Dezember 2024

USA: Nee Rüstungspaket för de Ukraine

Washington: De USA wüllt en nee Rüstungspaket för de Ukrain op den Weg bringen. Butenminister Antony Blinken sä, dat geiht um sowat 685 Millionen Euro. Mit dorbi sünd Raketen, Drohnen, man ok Landminen un Munitschoon. Güstern al harr Bunnskanzler Olaf Scholz bi en korte Visit in Kiew toseggt: De Ukrain kriggt för ehr Militär ok tokamen Johr Stütt ut Düütschland.

AfD will ne'e Jugendkoppel

Berlin: De Parteivörstand vun de AfD will nich mehr wieder mit jemehr egen Verenigung vun junge Lüüd tohoopgahn. De „Junge Alternative“ schall nich mehr för de Partei stahn, nee, se wüllt en ne’e Koppel op de Been stellen. Wenn dat na de Top-Lüüd vun de Partei geiht, sünd dor denn vun ganz alleen all Liddmaten binnen, de noch nich 36 Johr oolt sünd. Bet nu mööt Lüüd, de bi de „Junge Alternative“ mitmaakt, nich nödig in de Partei ween. De Behörden seggt: De „Junge Alternative“ is kloor rechtsextremistisch.

Bremen: Weniger Hüüs in Staatshand köönt op Schick brocht warrn

Bremen: Wenn dat um Scholen, Sporthallen un anner Hüüs geiht, de den Staat tohöört, kann Bremen tokamen Johr blots dat Allernödigste repareren laten. Dat Geld fehlt, un dorum köönt se sik blots um dat kümmern, wat nu al plaant is. So steiht dat in en Vörlagenpapeer för den Senaat, de sik in en Halfstunnstiet tohoopsett. Bremen bruukt över 24 Millionen mehr as se eerst plaant harrn. Wat se al anfungen hebbt, schall wiederlopen, man bavento maakt se blots dat wedder trecht, wat afsluuts nich töven kann.

Bremerhaven: Ne’e Utstellung in’t Klimahuus kummt later

Bremerhaven: De Utstellung in’t Klimahuus to Extremweer geiht later los. Dat hett Butenunbinnen to weten kregen. Wat dor achter stickt: Bi de Technik löppt noch nich allens rund. Egens schull dat övermorgen losgahn – nu plaant se den Start för Anfang Januar. In’t Klimahuus weet se noch nich, wat se so weniger Geld inspeelt. De Utstellung kost mehr as 14 Millionen Euro.

Football: DFB-Pokaal – Werder mutt gegen Darmstadt ran

Bremen: Vunavend geiht dat los för de letzten 16 Mannschaften in den DFB-Pokaal. Werder Bremen mutt gegen de Tweetliga-Kru Darmstadt 98 ran. Un denn speelt vundaag noch Regensborg gegen Stuttgart, Bielefeld gegen Freiborg un de Bayern begrööt den Meister ut Leverkusen.

Dat Weer

Un woans süht dat mit dat Weer umto ut? Opstunns hebbt wi in Bremen, Brevöör un Leer 6 Graad, in Bremerhaven sünd dat 7 Graad. Vundaag: Noch an’n Vörmiddag treckt de Regen na Süden af. Denn is dat dröög, un de Sunn waagt sik sogor mal rut. Gegen Middag kaamt aver frische Schuer vun de Noordsee rin. Ok de treckt na Süden wieder. An’n Avend is dat an de Küst al wedder dröög. Dat Thermometer krabbelt op 6 bet 8 Graad. De Wind dorto weiht in’t Binnenland flau oder en beten mehr vun de westen bet noordwesten Kant, an de See ok frisch un mit deegte Böen ut Noordwest bet Noord. Tokamen Nacht: De Schuer treckt eerst noch na Süden af, achteran pladdert dat blots noch af un an mal. Mag ween, un wi kriegt ok kort mal de Steerns to sehn. Bi 5 bet 1 Graad. Morgen: Mal mehr, mal weniger Wulken, hier un dor regent dat ok. Man dat gifft doch Schangs op en beten Sunnschien. Bi 4 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.