Plattdeutsche Nachrichten Plattdüütsche Narichten vun'n 28. November 2024

Möögliche Sabotaaschakten: Düütsche Sekerheitsbehörden besorgt

Berlin: De Baas vun den Bunnsnarichtendeenst Bruno Kahl wohrschaut vör en jümmer aggressivern Denkwies Russlands gegenöver den Westen. Kahl see to de ARD, dat Russland dör Sabotaasch versöken künnt, ok Düütschland dör´nanner to bringen. Dorto is dat wohrschienlich, dat ok in Düütschland „kritsche Infrasturktur“ utspioneert warrt.

Gesundheitsminister hett woll Corona-Wohrschostand bewusst nich daalsett

Berlin: Bunnsgesundheitsminister Karl Lauterbach (SPD) hett wieldess de Pandemie woll dorför sorgt, dat dat Corona-Risiko nich as wetenschaplich anraadt, daalsett wurr. Dat wiest Naforschen vun WDR, NDR un Süüddüütsche Zeitung. Dorna hett Lauterbach Anfang 2020 maandeland persöönlich verhinnert, dat dat Robert-Koch-Institut dat Risiko vun „bannig hooch“ op „hoch“ daalsett hett. Dat wiesen E-Mails twuschen den Ex-RKI-Baas Lothar Wieler un Lauterbach.

Stadthall in Bremerhoben blots verminnert bruukbor

Bremerhoben: Wiel de Stadthall hoochnödig saneert warrn mutt, kann se nu blots noch verminnert bruukt warrn. Vun Juli tokamen Johr af an, köönt ut Sekerheitsgrünn blots noch bet to 1000 Minschen to glieke Tiet in de Hall. To jedeen Veranstalten mutt denn de Behöörden eegens tostimmen.

Streik in den Ollenborger Busverkehr

Ollenborg: Hüüt streiken de Fohrer vun den Ollenborger Busbedriever VWG. Dor achter stickt stöckerige Tarifverhanneln. Dat Ünnernehmen maakt künnig: Vun Bedrievsanfang bet Bedrievsenn fallen dorüm all Stadtbussen kumplett ut. De Regionaalbussen sünd na Angaav vun de VWG nich drapen.

Sieg un Nedderlaag för Bunnsligisten in Football-Champions-League

Zagreb: Borussia Dortmund blifft in de Football-Champions-League wiederhen op en bannig gooden Kurs. De BVB hett bi Dinamo Zagreb ut Kroatien mit 3:0 de Nees vörn un steiht nu in de Tabell op Platz 4. De VfB Stuttgart hett bi den serbschen Meister Rooder Stern Beldgrad mit 1:5 verloren un weet noch nich of he dat in de Play-offs schafft.

Dat Weer

Un nu kiekt wi op dat Weer: In Möppen hebbt wi 6 Graad, in Bremen 7 Graad un in Bremerhoben un Emm sünd dat opstunns 8 Graad. Hüüt wesseln sik dicke Wulken un en beten Sünn af. Schuern kann dat ok, övern Namiddag blifft dat aver ok mal dröög bi 7 bet 9 Graad. In de Nacht wedder Wulken aver ok mal blinken Steerns, de denn över Nacht meist de Nees vörn hebbt. An Morgen warrt dat wedder daakig bi 6 Graad op de Eilannen un 4 bet minus 2 Graad in´t Binnenland. De Freedag fangt daakig an, övern Vörmiddag sünd dicke Wulken an Heven, de Sünn schafft dat blots kort mal an de Wulken vörbi. Dat Thermometer wiest us 4 bet 5 Graad in´t Binnenland un 7 Graad op de ostfreeschen Eilannen.

Dat weren de Plattdüütschen Narichten. Tohoopstellt vun Ralph Stöltig. Op platt torechtmaakt un vöörleest vun Martina Brünjes.