Plattdeutsche Nachrichten Plattdüütsche Narichten vun'n 5. Juli 2024
Standdatum: 5. Juli 2024.
Informationen zum Audio
- Verfügbar bis: 5. Juli 2025 Informationen zur Verweildauer
Ampel-Koalitschon bringt Huusholt-Striet to Enn
Berlin. De Ampel-Koalitschon hett ehrn Striet över den Huusholt to Enn brocht. Bunnskanzler Olaf Scholz, Finanzminister Christian Lindner un Wirtschaftsminister Robert Habeck snackt na ehr Beradens siet güstern Namiddag vun en Dörbröök un hebbt an´n Morgen ehr Fraktschonen doröver Naricht geven. Dorna wüllt SPD, Gröne un FDP de Schuldenbrems schienbor ok in´t tokamen Johr inholen. Bavento schall dat Geld för Verdeffenderen nich so dull wassen, as sick dat Minister Boris Pistorius wünscht. Enkelte Punkte maken Scholz, Lindner un Habeck glieks op en Presskonferenz üm Klock elven bekannt.
Grootbritannien steiht vör Machtwessel
London. Grootbritannien steiht na 14 Johr vör en Regerungswessel. De oppositionelle Labour-Partei kaamt bi de Parlamentswahl afsluuts op de mehrsten Stimmen. De konservativ Regerungsbaas Rishi Sunak hett sien Nedderlaag inrüümt un warrt dormit König Charles seggen, dat he sien Posten opgeven will. De beopdragt wohrschienlich noch vundag Labour-Baas Keir Starmer dormit, en neje Regerung to bilden.
Staatsgerichtshoff vun Bremen hett mit Börgerschaftswahl to doon
Bremen. De Staatsgerichtshoff hett in´n Ogenblick mit de verleden Börgerschaftswahl to doon. Dat is wegen en Klaag vun de AfD. De geiht dorgegen vör, dat se nich to de Wahl tolaten weer. De Staastgerichtshoff vun Bremen is de letzte tostännige Steed in en Verfohren, dat al en poor Stappen dörlopen hett. Wohrschienlich steiht in söss Weken fast, of de Wahl to de Breemschen Börgerschaft nochmal makt weern mutt.
Regerungskoalitschon Neddersassen striedt sick över Betahlkort för Minschen op de Flucht
Hannover. De Betahlkort för Minschen op de Flucht sorgt för Arger in de root-grönen Regerungskoalitschoon vun Neddersassen. De Grönen sehn in dat Doon vun de SPD en Bröök vun den gemeensamen Koalitschoonsverdrag. Se sünd gegen en Boorgeld-Grenz vun 50 Euro, de Flüchtlinge mit de Kort afhalen dörven. Ministerpräsident Weil stellt sick aver achter den Middelweg vun de Länner. Bremen geiht bi de Betahlkort man en egen Weg. SPD, Gröne un Linke sünd sick hier övereens kamen, dat mit de Kort bit to 120 Euro in´n Maand in boor afholt weern dörven.
Düütsche Football-Natschonal-Mannschaft drapt in dat EM-Viddelfinaal op Spanien
Stuttgart. Bi de Football-Europameisterschaft draapt de DFB-Utwahl vunavend ünner de letzten acht üm Klock söss an´n Avend op Spanien. De gellen as Titelfavorit. Wenn sick de düütsche Mannschaft dörsett, denn warrt se an´n tokamen Dingsdag op den Winner vun dat Speel twüschen Portugal un Frankriek drapen. Dat Speel ünner de letzen acht fangt üm Klock negen an´n Avend in Hamborg an.
Dat Weer
Un nu noch en Blick op dat Weer: In Nordholde 15, in Bremen-Mitt 14 , in Bremerhaben 16 un in Cuxhaben sünd dat opstunns 15 Graad. Af Middag weern de Wulken mehr un mehr un ok dichter. Dat kaamt en beten Natt vun baven. Vunavend, to´n Buten-Footballkieken mit anner Lüüd, sünd enkelte Regenschuer ünnerwegens. De Wind weiht in Maten vun de Süüdwesten Kant. An de Nordsee stieve bit störmsche Böen. Dat Thermometer wiest 15 bit 19 Graad. In de Nacht sünd vele Wulken an´n Heven. Af un an kaamt dat ok Natt vun baven. In´n Verloop hört dat op to regen un af un an kieken de Sterns dör de Wulken. 13 bit 14 Graad wiest dat Thermometer. Morn gifft dat neven en poor Wulken Sünnschien. In´n Dagsverloop gifft dat Regen un enkelte Gewidder mit Hagel un Stormböen bi 20 bit 25 Graad. Sünndag: Mal so mal so. Sünnschien, Wulken un Regenschuer bi 18 bit 21 Graad.
Dat weern de Narichten op platt. Tohoopstellt hett se Carsten Putz. Op Platt trechtmaakt un vörleest vun Markus Weise.