Plattdeutsche Nachrichten Plattdüütsche Narichten vun'n 31. März 2025

Hölpslüüd bargt Överlevende in Myanmar

Mandalay: Meist 60 Stünnen na dat swore Eerbevern hebbt Hölpslüüd in Myanmar dree Minschen reddt, de verschütt weern, dorünner en Kind vun fief Johr. Se hebbt ünner en Hoochhuus in de Stadt Mandalay legen, dat instört weer. Dat Hapen, datt se noch wietere Överlevende findt, ward vun Stünn to Stünn weniger. Wieldess hett de Weltgesundheitsorganisatschoon de hööchste Notfall-Kategorie utropen. Se würrn hoochnödig acht Millionen Dollar bruken, üm Leven to redden un dat Utbreken vun Süken to verhinnern, as de WHO vermellt.

Koalitschoonsverhanneln geiht wieter

Berlin: Vör de tokamen Runn vun dat Koalitschoonsverhanneln hebbt Politikers vun Union un SPD dorto opropen, op de annern totogahn. SPD-Baas Lars Klingbeil säe in de ARD, dat geiht nu dorüm, wat Grodet för dütt Land to verännern. CSU-Landsgruppenbaas Alexander Dobrindt hett dorto opropen, dat Gemeensame in’n Vördergrund to stellen. Hüüt ward in dat CSU-Huus wieter verhannelt.

Gröttste Industriemess vun de Welt hett in Hannover anfungen

Hannover: In Neddersassens Hauptstadt hett an’n Avend de Hannover Mess anfungen. Se is de gröttste Industriemess vun de Welt. Dat Start-Teken hett de geschäftsföhrende Bunnskanzler Olaf Scholz geven. He ward sik an’n Vörmiddag bi den traditschonellen Kanzlerrundgang en Överblick verschaffen. Partnerland vun de Hannover Mess is in dütt Johr Kanada.

Havenwelten för Autos nich to erreichen

Bremerhaben: In Bremerhaben is vun hüüt an de Tofohrt to de Havenwelten för den Autoverkehr sperrt. Grund dorför sünd Boarbeiden an’n Verbindungskanaal twüschen den Oolen un den Nee’en Haben. De Arbeiden fangt jümmers an’n fröhen Morgen an un duert woll bet to’n Namiddag. In düsse Tiet is de direkte Tofohrt to dat Havenwelten-Parkhuus un to’n Zoo sperrt. Footgängers sünd dorvun nich bedrapen.

In Neddersassen fangt dat Abiturprüfen an

Hannover: För meist 32.000 Schoolkinner in Neddersassen fangt hüüt dat schriftlich Abiturprüfen an. Toeerst geiht dat mit Eerkunn los. Vör de Oosterferien kaamt noch Kunst un de Natuurwetenschaften na. De letzte Klausuur is för Mitt Mai ansett. In’t Land Bremen gaht dat Prüfen eerst een Week na de Oosterferien los.

Dat Weer

Un nu en Blick op dat Weer: In Cloppenborg 6, in Bremerhaben un Leer 7, un in Bremführ sünd dat opstünns 8 Graad. Hüüt is dat mal mehr, mal weniger wulkig un dröög. Besünners in’n Süüden vun Bremen hollt sik hier un dor noch länger dichte Wulken, anners kummt över Dag vun de Elv un Werser jümmer mehr de Sünn dör. To’n Avend hen is dat faken blots noch licht wulkig. Dat gifft keen Regen bi 8 bet 10 Graad op de Eilannen un an de Küst, un 11 bet 13 Graad in’t Binnenland. In de Nacht funkelt meisttiets de Steerns an’n Heben. Later bildt sik hier un dor Feller mit Daak. Dat blifft meisttiets dröög bi 5 Graad op de Eilannen un 1 bet -1 Graad in’t Binnenland. Morgen löst sik de Feller mit Daak gau op, denn schient meisttiets de Sünn. Later bildt sik hier un dor mal dünne opstiegen Wulken, de sik an’n Avend wedder oplöst. Dat blifft dröög bi 10 bet 16 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.