Plattdeutsche Nachrichten Plattdüütsche Narichten vun'n 1. April 2025

Ministerpräsident Weil vun Neddersassen will sien Amt ut de Hand geven

Hannover: Ministerpräsident Weil vun Neddersassen will sien Amt tokamen Maand ut de Hand geven. De 66-Jöhrige will sik, na NDR-Informationen to`n Mai as SPD-Lannesvörsitter un ok as Regeerungs-Boss trüchtrecken. De, de to Tied as Nafolger gellt is Minister för Wirtschaft Olaf Lies. Weil is nu al siet 12 Jahren Ministerpräsident vun Neddersassen.

Spezialschipp mit Castor-Behälters kummt in Nordenham an

Nordenham: In´t Haben vun de Stadt in Neddersassen is an´t fröhen Morrn een Schipp ankamen, dat vull is mit hoch radioaktivem Atommüll. De Polizei is mit een Barg vun Lüüd dor, üm den Oort aftosekern. In de kamen Daag willt se seven Castoren op Iesenbahnwagens  opladen. Se schüllt denn in een Twischenlager na Nedder-Bayern kamen. De Atommüll kummt ut eene Anlage in´t britische Sellafield, wo se den Müll wedder opbereid. Gegner vun Atomkraft hebbt an´t Nomdag in Nordenham to een Mahnwacht opropen.

Eerste düütsche Fro is in´t Weltall losflogen

Cape Canaveral: De Förskerin för Robotik Rabea Rogge is as eerste düütsche Fro in`t Weltall losflogen. De 29-Jöhrige, ut Berlin, höört to een internationalet Team, dat an Bord vun een Dragon-Kapsel, vun´t Weltruumbahnhoff Cape Canaveral in´t US-Bunnsstaat Florida, afhoben is. De Försker willt veer Dage lang, op eene nee`e Ümloopbahn, de Polarregionen begluupögen. Se hebbt mehr as 20 Experimente plaant. De Mission is privat fenanzeert. Dat is een Rakeet vun dat Ruumfohrtünnernehmen SpaceX.

Union un SPD willt hütt in lütte Koppeln beraden

Berlin: Union un SPD willt ehr Koalitionsverhanneln hütt in lütte Koppeln wieter maken. Dorto schüllt an´t Vomdag Ünner-Arbeitskoppeln tosamen kamen. So heet dat ut de Kreisen, de an´t Verhanneln sünd. Gistern harrn sik de Haupt-Arbeitskoppeln mit 19 Vertredderinnen un Vertredern in de CDU-Zentrale in Berlin dropen. Man wat dorbi rutsuert is, is nich bekannt. De gröttste Striet geiht üm de Finanzen, de Stüer- un Wirtschaftspolitik, un de Migration gegen dat Gesetz.

Mülllager in Bremen dröfft se grötter maken

Bremen: Dat Müllager Blockland in de Stadt dröfft se grötter maken. Dat is bi een Studie rutsuert, de dat ünnersöökt hett. Dormit will sik de Senat an´t Vomdag befaten. De Bremer Stadtreinigung harr den Opdrag geven, to prüfen wat dat mööglich is de Anlage op 60 Meters in de Hööchte to vergrötten. Un dat is nu mööglich. So as se nu is, kunn se in üm un bi 10 Jahren keenen nee`en Müll mehr opnehmen. Mit dat grötter maken kann dat nu bit 2041 mit dat Müllager wieter gahn.

Dat Weer

Un nu een Blick op dat Weer: In Emm 1, in Defhold 2 un in Bremen un Bremerhaben un sünd dat opstünns 4 Graad. Hütt hebbt wi nich vele Wulken an´t Heven, de Sünn lacht us meist an. An´t Nomdag kummt hier un dor een paar opstiegen Wulken op, man dat blifft dröge, bi 13 bit 14 Graad. Tokamen Nacht keene Wulken un dor kummt nix vun baven rünner. In´t Süden un Oosten vun Bremen kummt morrn fröh Nevel op. Op Wangerooge 6 Graad. Un op dat faste Land hebbt wi 4 bit 1 Graad. Morrn fangt de Dag wedder mit Nevel an. Man bit to´n Middag lööst sik de Daak op. Denn schient för us de Sünn. Keene Wulken un keen Regen. De Temperaturen liggt bi 11 bit 17 Graad. Dunnerstag is dat dröge un de Sünn schient, dat is fein Fröhjohrsweer, bi 15 bit 20, un op de Eilannen 12 bit 14 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.