Plattdeutsche Nachrichten Plattdüütsche Narichten vun'n 3. April 2025

US-Präsident Trump: Noch mehr Toll

Washington: US-Präsident Donald Trump hett fastleggt: He verlangt mehr Toll. Wat rinkummt, schall ok wedder rutgahn –dat gellt för Woren vun överall op de Welt. För Woren ut de Europääsche Union will Trump 20 Perzent an Toll bavento. Wat ut China na de USA rinkummt, kriggt en Opslag vun 34 Perzent. Trump seggt: De Unnernehmen schüllt jemehr Fabriken in de USA boen un so dor mehr Arbeitssteden inrichten. De EU will dor wat gegen setten.

Elon Musk woll bald keen Raatgever mehr för de US-Regerung

Washington: Wo dat mit de Tokunft utsüht för den veelfachen Milliardär Elon Musk as amtlichen Berader för de US-Regerung, dat is nich kloor. En Reeg Medien seggt: Musk will ut den Job rut. Seggt warrt: Präsident Donald Trump hett dat al in sien binnersten Kring vun Raatgevers bekannt maakt. En Sprekersch vun Trump sä aver in Washington: Musk blifft so lang, betdat he sien Job trecht hett.

Verkehrsministers vun de Länner: Föhrerschien schall billiger warrn

Nörnbarg: De Verkehrsministers vun de Länner sett sik bi den Bund dorför in, dat en Föhrscherschien-Prüfung wedder weniger kösten schall. Vör allen in de Theorie warrt to veel prüüft. So warrt dat dürer un dürer, un jümmer mehr fallt dör, meen Bayerns Verkehrsminister Christian Bernreiter. Opstunns köst en Föhrerschien bet 4000 Euro – dat is kloor mehr as noch vör enige Johr.

Bremen will Millionen för den Schutz vun Deerten un Planten utgeven

Bremen: De Senat will bet 2027 knapp veerenhalf Millionen Euro dorför utgeven, dat Insekten, anner Deerten un Planten schützt warrt. Mit dat Geld wüllt se mehr Blöhland inrichten, dat de Umweltbedriev Bremen un dat Goornbo-Amt Bremerhaven anleggt hebbt. Hier köönt Insekten un anner Oorten unnerkrupen un hier finnt se wat to freten. Vunnamiddag besnackt se dat in de Bremer Umweltdeputatschoon.

VfB Stuttgart steiht in’t Endspeel um den DFB-Pokal

Stuttgart: De VfB steiht in’t Endspeel um den Düütschen Football-Pokal. Güstern Avend hebbt de Swaben to Huus gegen RB Leipzig mit 3:1 de Bavenhand hatt. Dat Endspeel is an’n 24. Mai in Berlin. Denn mööt de Stuttgarter gegen Arminia Bielefeld ut de drüdde Liga ran.

Dat Weer

Un woans süht dat mit dat Weer umto ut? Opstunns hebbt wi in Bremerhaven 9 Graad, in Bremen un Weyerbarg sünd dat 10 un in Möppen 11 Graad. Vundaag: Sunnschien, dröög un laue Vörjohrsluft. Wulken kriegt wi meist gor nich to sehn. Dat Thermometer krabbelt in’t Binnenland op 18 bet 20 Graad, an de See 13 bet 17. De Wind dorto weiht flau oder en beten mehr vun de oosten Kant, af un an ok mit Böen. Tokamen Nacht blenkert de Steerns. Bet to’n Morgen kann sik hier un dor Daak utbillen. An de See 8 oder 7 Graad, anners bi 4 bet 1 Graad. Morgen: Eerst noch veel Sunnschien, hier un dor dakig, överall dröög. An’n Namiddag kaamt en poor opstiegen Wulken op, man dat blifft hell un kloor. Bi 17 bet 21 Graad, an de See bi frischen Wind nich mehr as 11 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Michael Kück.