Plattdeutsche Nachrichten Plattdüütsche Narichten vun'n 2. April 2025

Bunnsbinnenministersch Nancy Faeser hett Kriminaltallen 2024 vörstellt

Berlin. De Tall vun de in Düütschland opschreven Verbreken, wo Gewalt mit in´t Speel weer, is in dat verleden Johr üm 1,5 Perzent hooch gahn. Dat is de hööchste Weert siet dat Johr 2010. Dat steiht in de Kriminaltallen vun de Polizei för dat verleden Johr. De Noch-Bunnsbinnenministersche Nancy Faeser hett se an´n Morgen vörstellt. Dorin steiht ok, dat toletzt mehr Kinner un junge Lüüd straafschüllig wurren weern. Ünner den Streek wurren man weniger Verbreken tellt as noch in dat Johr 2023.

Israel will grode Delen vun den Gazastriepen övernehmen

Tel Aviv. As dat de Minister för Verdeffenderen Israel Katz vermellt, will dat Land sien Militärinsatz in den Gazastriepen grötter maken un grode Landstücken dorvun övernehmen. Düsse schullen to israelisch Sekerheitszoonen verklort weern. Nögere Angaven, wo groot dat Landstück ween schall, hett Katz nich makt. Teel is sien Angaven na, de terroristisch Infrastruktur kaputt to maken. Israel harr vör goot twee Weken sien düchtige Angrepen ut de Luft op den Gazastriepen wedder opnahmen.

Batman-Star Val Kilmer is doot

Los Angeles. De amerikanisch Schauspeler Val Kilmer is doot. Dat vermellen amerikanisch Medien un betrecken sick op sien Dochter. Kilmer wurr 65 Johr oolt. De in Kalifornien op de Welt kamen Schauspeler hett sick ünner annern dör Films as „Topgun“, „The Doors“ un „Batman Forever“ överall op de Welt en Naam makt. Kilmer weer in de achtziger un negentiger Johrn en vun de Schauspelers in Hollywood, de bannig veel Geld verdenen.

En poor Minschen wegen Rook vun en Phosphorgranaat in´t Krankenhuus

Edewecht. In de Gemeend in den Kreis Ammerland sünd negen Minschen wegen en qualmen Phosphor-Granaat in´t Krankenhuus brocht wurren. Ünner se weern ok dree Kinner. Lüüd harrn güstern Namiddag Rook vun en Wisch opstegen sehn. Se harrn denn de Füerwehr anropen. Woher de Phosphor-Granaat stammen deit un woso se to qualmen anfungen hett, dat ünnersökt nu de Polizei.

Football: Arminia Bielefeld ut de drütten Liga glückt Pokal-Sensatschoon

Bielefeld. In dat Speel ünner de letzten Veer vun den DFB-Pokaal hett Arimina Bielefeld ut de drütten Bunnsliga överraschend den Winner vun´t letzt Mol, Bayer Leverkusen, vun´n Platz schickt. De Bielefelder wunnen mit twee to een un stahn dormit in dat Endspeel vun den Wettstriet in Berlin. Vunavend klort sick, wer Wedderpart warrt. Dorto drapen Stuttgart un Leipzig in dat tweete Speel ünner de letzten Veer openanner.

Dat Weer

Un nu noch en Blick op dat Weer: In Bremführ fief, Bremen-Mitt negen, in Bremerhaben söss un in Weiherbarg sünd dat opstunns fief Graad. Vundag lacht den ganzen Dag de Sünn vun´n Heven. Viellicht sünd en poor lockere Wulkenfeller dorbi. Dat blifft dröög. De Wind weiht eerst en beten vun de Noordoosten bit Oosten Kant. Mennigmal ok in Maten un in Böen. Dat Thermometer wiest an de Küst 12 bit 15 Graad. In´t Binnenland 16 bit 18 Graad. In de Nacht sünd en poor Wulken an´n Heven. Bit to´n Morgen kann sick flache Dunst un Nevel billen. Man dat blifft dröög bi een bit söven Graad. Morn tövt Sünnschien ohn Wulken an´n Heven op us. En lauet Fröhjohrsweer. Dat blifft dröög bi 13 bit 20 Graad. Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.