Plattdeutsche Nachrichten Plattdüütsche Narichten vun'n 6. Juli 2023

Heizungsgesetz: Ampel söcht na Kurs

Berlin: Wo dat Bunnsverfatensgericht dat Heizungsgesetz eerst mal utbremst hett, wüllt de Top-Lüüd vun de Ampel-Parteien hüüt Vörmiddag jümehren Kurs afsnacken. Se nehmt dat Ordeel an un warrt dat Gesetz düsse Week nich mehr dör den Bunnsdag bringen, sä SPD-Frakschoons-Baas Mützenich. Dat Bunnsverfatensgericht harr dat Heizungsgesetz güstern Avend en P vörsett. De Richters in Karlsruh hebbt seggt: Dat Parlament müss mehr Tiet kriegen, sik to beraden. Se hebbt dormit en dringlichen Andrag vun den CDU-Mann Heilmann annahmen.

Bunnsdag will ne’e Regeln to’t Hölpen bi’t Starven fastleggen

Berlin: De Bunnsdag stimmt hüüt Vörmiddag över ne’e Regeln to de Hölp bi’t Starven af. Twee Afgeordneten-Koppels hebbt Vörslääg op’n Disch leggt. In dat ne’e Gesetz schall binnenstahn, woans Minschen, de nich mehr leven wüllt, an so’n Medikamenten ran kaamt, un woans sik Hölpslüüd gegen Strafen wohren köönt. Na een Vörslag kann Medizin, mit de een sik sülvst vun de Welt bringen kann, op Rezept utgeven warrn. De anner Weg seggt: De bi’t Starven mithölpt, hannelt gegen dat Gesetz un kriggt en Straaf. Dat kann aver Utnahmen geven.

Russsche Rakeet geiht woll op Wahnblock in Lwiw daal

Lwiw: Bi en Raketen-Attack op Lwiw in den Westen vun de Ukraine sünd tominnst dree Minschen to Dode kamen. De Börgermester vun de Stadt sä: Tominnst noch acht Minschen sünd verletzt worrn. Dat kunnen aver noch mehr warrn. Vele Wahnungen harrn war afkregen. Seggt warrt: Ok bi de tweie Stadt Bachmut harrn russsche Suldaten wedder angrepen. Se weren aver nich dörkamen, dat hebbt de böversten Generalen ut de Ukraine vermellt. Nüms kann aver seggen, wat an düsse Narichten wohr is un wat nich.

Ariane-5-Rakeet op ehren letzten Törn na’t All

Kourou: De letzte europääsche Ariane-5-Rakeet is verleden Nacht losflagen. Vun den Weltruumbahnhoff Kourou in Franzöösch-Guayana is se mit twee Satelliten an Boord afgahn: een düütschen för Narichten un een franzööschen Militärsatellit. Wichtige Dele vun Ariane 5 kaamt ut Bremen. In Tokunft wüllt se den Nafolger Ariane 6 in’t All scheten.

Bremen: an de Gleisen warrt boot - Stratenbahnen fohrt weniger

Bremen: De Bremer Stratenbahn AG will vun hüüt op an vele Gleisen un Weichen in de Binnenstadt un in Osterholt nee maken. Welk Stratenbahnen mööt en Umweg fohren annern fohrt gor nich. Dat geiht um de Linien 1, 5 un 10. De BSAG will na dat eerste Wekenenn in’n August mit de Arbeiden trecht ween.

Dat Weer

Un woans süht dat mit dat Weer umto ut? Opstunns hebbt wi in Bremerhaven 14 Graad, in Bremen, Bevers un Kneten sünd dat 16 Graad. Vundaag: Mal Sunnschein, mal dichte Wulkenplacken, hier un dor kann dat ok pladdern. An’n meisten lacht de Sunn op de Inseln. Dat Thermometer krabbelt op 19 bet 23 Graad. De Wind dorto weiht flau, an de See ok en beten mehr, vun de süüdwesten bet westen Kant. Tokamen Nacht: klor, man af un an treckt dichte Wulken dör. Dröög. Bi 15 Graad op de Inseln, anners 13 bet 10 Graad. Morgen: Veel Sunnschein. Dröög. 25 bet 28 Graad, op de Inseln 22 bet 23 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.