Plattdeutsche Nachrichten Plattdüütsche Narichten vun'n 30. Dezember 2024

Politischet Oparbeiden in Magdeburg

Berlin – Eeneenhalf Weken na den Anslag vun Magdeburg fangt ok in’n Bunnesdag dat politische Oparbeiden an. De Binnenutschuss kummt to een Drepen tosamen. Mit darbi sünd ok Bunnesbinnenministersche Faeser un de Böversten vun BKA un Bunnesnarichtendeenst, as ok de Oberbörgermeistersche vun Magdeburg. Bi dat Drepen geiht dat üm mögelk Pannen vun de Ämters, to’n Bispill ok dat Sekern vun’n Wiehnachtsmarkt. Dat geiht aver ok üm dat Uttuuschen vun verenkelten Steden över den Kierl, de dat daan hett.

Jimmy Carter is sturven

Washington – De ehemalig US-Präsident Jimmy Carter is doot. De Demokraat is hunnert Johr old worrn un weer darmit de Präsident in de Geschicht vun de USA, de an’n längsten leevt hett. Sien Amtstied hett blots veer Johr duert vun 1977 bit 1981, denn hett he de Wedderwahl gegen Ronald Reagan verloorn. Op de heele Welt hebbt Staats- un Regeernbaas dat Wark vun Jimmy Carter ehrt: he is to’n Bispill 2002 mit’n Fredennobelpreis uttekent worrn.

Nee’e Spoor bi’t kaputte Ostsee-Kabel

Helsinki – Na den Utfall vun een Ünnerwaterstroomleitung in de Ostsee hebbt finnische Ermiddler een verdächtig Sliepspoor an’n Grund vun de See faststellt. Se is woll dutzende Kilometer lang. Dat gifft den Verdacht, dat de Öltanker „Eagle S“ de Kabel twüschen Finnland un Estland kaputt maakt hett, wiel he sien Anker an’n Grund achter sik her trocken hett. Dat Schipp is vun de finnischen Ämters fastsett worrn. De EU meent, dat Schipp höört to de so nöömte russische Schaddenflott. Darmit sünd Scheep meent, de Russland bruukt, üm Straafen to ümgahn.

Milliardenschäden in 2024 dör rusig Weer

Berlin – Rusig Weer hett 2024 in Dütschland versekerte Schadens vun 5,5 Milliarden Euro maakt – dat taxeert de Versekerer in Dütschland. Dat wees twars weniger as in’t Johr vördem, aver de Schadensbilanz wees jümmers noch hooch, so de Gesamtverband vun de Dütsche Versekerungswertschupp. He foddert, Vörsoorg un dat Anpassen an den Klimawannel mehr na vörn to rücken, üm gegen Schäden dör Extrem-Weer gegenan to gahn. Darto höört Hoochwaterschutz mit Dämmen un Dieken, de op de Reeg sünd.

Nee’e Direktverbinnung Jaa-Werser-Haben na China

Wilhelmshaben – De Jaa-Werser-Haben hett vun nu an een Direktverbinnung in een vun de gröttsten Habens vun China. Vundaag geiht dat in de Habenstadt Ningbo mit een nee’e Expresslinie loos, de in blots 26 Daag Wilhelmshaben anstüert, ahn Twüschenstopp. Dat erste Schipp schall an’n 24. Januar bi’n Jaa-Werser-Haben ankamen. Vun Wilhelmshaben ut gaht de Woor denn wieter mit de Bahn bit na Budapest, man ok per Schipp an de Nordküst vun de USA.

Dat Weer

Un nu een Blick op dat Weer: in Deefholt 4, in Bremen 5 un in Bremerhaben un op Wangerooge sünd dat opstunns 7 Graad. De Dag bringt hüüt meist dicke Wulken, dat lockert blots af un an mal op un dat gifft jümmer wedder ok mal Sprütteregen. Dat is een beten milder as toletzt – bi 6 bit 8 Graad. Tokamen Nacht is de Heben meist överall gries un dar fallt hier un dar een paar Druppen. Dat Thermometer sackt blots een beten op 7 bit 5 Graad. Morrn, an’n Ooltjohrsabend, blifft dat woll gries un dakig, de Sünn kiekt meist gar nich rut un vör allens to de Nordsee hen fallt af un an een beten Sprütteregen, bi 6 bit 8 Graad an’n Vörmiddag. Vun’n Middag an sackt dat Thermometer all un in de Silvesternacht kummt vun de Nordsee mehr un mehr Regen op.  Dat weern de Narichten op Platt. Birgit Sagemann hett se tohoopstellt. Op platt trechtmaakt un vörleest hett se Heidi Jürgens.