Plattdeutsche Nachrichten Plattdüütsche Narichten vun'n 2. Januar 2025

Amokfohrer vun New Orleans hett mit Islamismus to doon

New Orleans: De Mann, de mit sien Auto in en Minschenmengde rinfohrt is, hett sik vun de IS-Terror-Miliz anregen laten. US-Präsident Biden säe, datt Videos vun den Mann op sien islamistisch Gesinnen henwiest. He weer an’n Neejohrsmorgen mit en Auto dör en Viddel vun New Orleans fohrt, wo veele Minschen gern utgaht. Foffteihn Minschen sünd dorbi dootbleven. De Fohrer is vun de Polizei dootschaten worrn.

Internatschonal Mitgeföhl na Anslag in New Orleans

Berlin: Veele Politikers hebbt verbaast op de Amokfohrt vun New Orleans reageert. Bunnskanzler Scholz hett op X vun Haat ahn Sinn snackt. De Bunnsregeern truert mit de Familien un Frünnen vun de 15 Doden un wünscht de Versehrten, datt se dat gau beter geiht. Ok de EU-Butenbeopdragte Kallas hett de Opfers dat Mitgeföhl vun de Europääschen Union utspraken.

189 Haftbefehlen gegen Rieksbörger

Berlin: Bunnswiet söcht de Polizei 189 so nöömte Rieksbörger per Haftbefehl. Dat steiht in de Anter vun dat Bunnsbinnenministerium op en Anfraag vun de Linken in’n Bunnsdag. In de mehrsten Fallen geiht dat üm Dwang, dat Fälschen vun Urkunnen, Beleidigen oder Ophissen gegen Volksgruppen. Mehr as 20 vun de söchten Rieksbörger sünd na Menen vun de Sekerheitsbehörden opstünns in’t Butenland.

Füerwehr un Polizei meist gor nich in’n Insatz na Storm

Bremen: De Storm in de verleden Nacht hett in Bremen, Bremerhaben un in’n Noordwesten keen grötteren Schaden anricht. Füerwehren un Polizei hebbt vermellt, datt se enkelte Insatzen harrn wegen afbraken Äst oder ümkippte Bööm. An’n Namiddag hett en Boom in Utbremen den Togverkehr na Hamborg behinnert.

Regionaaltöög twüschen Bremerhaben un Bremen fallt ut

Bremerhaben: Op de Regionaalbahnstreek twüschen Bremen un Bremerhaben-Lehe gifft dat hüüt Avend Boarbeiden. Dorüm fallt in de laten Avend- un Nachtstünnen veele Töög vun de Regio-S-Bahn RS2 ut. Dorför fohrt Bussen, de aver länger ünnerwegens sünd.

Dat Weer

Un nu en Blick op dat Weer: In Bremführ 1, in Bremen un Emmen 2, in Bremerhaben 3, un in Cuxhaben sünd dat opstünns 4 Graad. Hüüt gifft dat en gauen Wessel ut dichte Wulken un’n beten Sünnschien. Dorbi gifft dat af un an Regen-, Sneeregen- oder Grisselgrusselschuers, an de Noordsee fakener as in’t Binnenland. Dat ward nich mehr so lau as toletzt bi 5 bet 6 Graad. In de Nacht is dat mal mehr, mal weniger wulkig. Jümmer wedder treckt Schuers in’t Binnenland, an de Noordsee as Regen oder Sneeregen, in’t Binnenland as Snee oder Grisselgrussel. Twüschen Ems un Werser blifft dat ok mal dröög. Hier un dor kann dat glatt warrn wegen Sneematsch bi 2 bet 0 Graad. Morgen treckt besünners an’n Vörmiddag vun de Noordsee her dichte Wulken mit’n poor Snee-, Sneeregen- oder Grisselgrusselschuers dör. Dortwüschen, besünners vun Middag an, is dat ok mal för korte Tiet fründlich mit’n beten Sünnschien. An’n laten Namiddag gifft wedder fakener Schuers. Denn kann dat ok mal glatt ween un ok enkelte Gewidder geven bi 2 bet 4 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.