Plattdeutsche Nachrichten Plattdüütsche Narichten vun'n 31. Dezember 2024

Scholz roopt för 2025 to Tohoopstahn op

Berlin – Bunneskanzler Olaf Scholz hett in sien Neejohrsanspraak de Minschen darto opfoddert, in’n Februar to de Wahl to gahn. Buterdem hett he to Tohoopstahn un Toversicht för 2025 opropen. „Knööv kummt vun Tosamenhollen un wi sünd een Land, dat tosamenhollt“, sä de SPD-Politiker. Dat weer ok siet den Anslag op den Magdeburger Wiehnachtsmarkt mit fief Doden dull to spören wesen. Scholz sä Danke to allen Ersthölpern, Krankenplegern un Doktors.

Bremens Börgermeister wünscht sik Toversicht

Bremen – Börgermeister Andreas Bovenschulte roopt de Minschen in Bremerhaben un Bremen darto op, mit mehr Toversicht in de Tokunft to kieken. In sien Neejohrsanspraak wünscht he sik, dat de Lüüd sik mehr op ehr Stärken besinnt. Besünners wichtig is Bovenschulte Gemeensinn un Tohoopstahn. De Börgermeister roopt darto op, ok wenn dat mal nich so goot löppt, sik een Bispill an de Bremer Stadtmuskanten to nehmen: dat Leven in de Hannen to nehmen un een gode Tokunft to boon.

Dütsche verbruukt wedder mehr Gas

Berlin – De Gasverbruuk in Dütschland is in düssen Winter höger as in’t verleden Johr. Vun Oktober bit Dezember weern dat knapp söß Perzent mehr. Dat vermellt de Funke-Mediengrupp, de dat vun de Bunnesnettagentur to weten kregen hett. Besünners in de Industrie sünd goot negen Perzent mehr verbruukt worrn. Huusholt un Gewark verbruukt blots rund 2 Perzent mehr.

Busse un Bahnen fohrt hüüt un morrn anners

Bremen – Bi de Busse un Bahnen in Bremerhaben un Bremen gellt hüüt un morrn een Sünnerfohrplan. In Bremen fohrt de Busse un Bahnen vundaag bit gegen Klock 2 an’n Namiddag na den Sünnabend-Fohrplaan. Achternah sünd vele Linien in’n 20-Minuten-Takt ünnerwegens, viele Busse man ok nich so faken. In de Nacht fohrt in Bremen all Nachtlinien in’n 20-Minuten-Takt. In Bremerhaben fohrt de Nachtlinie bit Klock 5 in de Fröh jed half Stünn. Vun’n Morrn an gellt denn de Sünndagsfohrplan.

Bremer Polizei maakt sik för Silvester praat

Bremen – Dat Böllern is ok in’t Land Bremen to’n Johrswessel an een paar Steden verboden. Polizei un Binnenressort wüllt so Minschen un Deerten beter schützen un historisch Hüüs vör Brännen bewohren. So sünd an’n Hauptbahnhoff to’n Bispill Pyrotechnik as ok Wapens verboden. De Polizei will buterdem Kameras an’n Liev insetten, üm mögelk Attacken op Beamte optonehmen. De Bremer Füerwehr wahrschaut wegen dat stürmsche Weer vunabend ok vör de Gefohr vun Raketen, de ahn Kuntrull fleegt.

Dat Weer

Un nu een Blick op dat Weer: in Deefholt 2, in Bremen 4, in Bremerhaben 5 un op Wangerooge sünd dat opstunns 6 Graad. Vundaag, an’n Ooltjohrsabend, hollt sik dicke Wulken, de Sünn kiekt egens nich rut un to de Nordsee hen kann dat Sprütteregen geven. Man meist is dat dröög – bi 5 bit 8 Graad an’n Vörmiddag, later ward dat all een beten köhler. Tokamen Nacht is dat wieter meist gries mit dicken Wulken un af un an een beten Sprütteregen. Gegen Middernacht kummt vun de Nordsee mehr Regen op, de in de Fröh ok in Bremen ankummt. Dat Thermometer sackt op 5 bit 3 Graad – in de Fröh is dat 5 bit 8 Graad kold. Morrn blifft dat wieter gries un vör allens to de Nordsee hen pladdert dat för een länger Tied. Woanners is dat aver ok dröög, man de Sünn wiest sik meist nich – bi 8 bit 9 Graad.  Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.