Plattdeutsche Nachrichten Plattdüütsche Narichten vun'n 3. Januar 2025

Butenministersche Baerbock besöökt Syrien

Damaskus – Bunnesbutenministersche Baerbock is rund veer Weken na dat Störten vun’n Böversten Assad na Syrien reist. In de Hauptstadt Damaskus will se in’n Opdrag vun de Europäische Union ünner annern mit de nee’en Böversten snacken. Ünnerstützt ward Baerbock vun ehrn französisch Amtskollegen Barrot. Se kummt mit een „utstreekt Hand, man se rekent ok mit wat“, so de Grönen-Politikerin.

Scholz will europäisch Wertschuppsprogramm

Berlin – Bunneskanzler Scholz maakt EU-Kommischonspräsidentin von der Leyen den Vörslag, wat to daan, üm de Wertschupp in de EU mehr Stütt to geven. Dütschland wöör all vörangahn; över veele Latten köönt de Länner aver blots europäisch tosamen kamen. Den Kanzler geiht dat vör allens darüm, dat dat för de Ünnernehmen lichter ward. Üm dat hentokregen, mööt ünner annern de Kosten för den Papeerkrieg runner, foddert Scholz.  

Militär in Südkorea verhinnert Faatsetten vun Präsident Yoon

Seoul – In Südkorea hebbt Suldaten verhinnert, dat de Polizei den Präsidenten Yoon, de för de Döör sett worrn is, faatsetten kann. Dat vermellt südkoreansche Medien. Dat Militär hett sik woll den Polizisten in’n Weg stellt, heet dat. De Staats-Böverste harr Anfang Dezember för een korte Tied dat Kriegsrecht utropen un harr Korea in dat swarste Regeernslamassel siet velen Johrteinten stört.

Hannelskamer wieter gegen Lehrsteed-Afgaav

Bremen – De Hannelskamer föhlt sik bi ehr Bekritteln an de Lehrsteed-Afgaav op’n rechten Weg. Darachter stickt, dat een Richter an’n Staatsgerichtshoff sien Hoot nehmen hett. De Präses vun de Hannelskamer, Dubbert-Albers, snack vun een „heel besünneren Vörgang“. De Richter, de nu ut sien Amt gahn is, will dat henkregen, dat dat Bunnesverfatengericht de Bremer Lehrsteed-Afgaav överprööft. De Bremer Staatsgerichtshoff harr dat Gesett an’n Enn vun’t verleden Johr knapp för rechtens befunnen. De Richter, de nu trüchpedd is, harr all damals een anner Meen.

Bremen strahlt in künstlerisch Licht

Bremen – In de Binnenstadt ward vun hüüt Abend an för goot twee Weken historisch Hüüs un wichtig Steden midden in de Stadt mit een moiet Licht anstrahlt. Ünner dat Motto „Veer Johrstieden“ kriegt veele Hüüs as dat Raathuus, de Dom un Schütting een besünneret Licht. Dat Projekt „Lichter vun de Stadt“ gifft dat in dütt Johr all to’n fieften Mal un duert bit to’n 19. Januar.

Dat Weer

Un nu een Blick op dat Weer: in Bremerhaben 0, in Bremen un Deefholt 2 un op Wangerooge sünd dat opstunns 5 Graad. Vundaag is dat Weer wieter mal so, mal so. Vör allens an’n Vörmiddag un Middag treckt dicke Wulken mit een paar Snee-, Sneeregen- un Grisselgrusselschuers dör. Bi dulleren Schuers kann dat ok mal glatt weern. Dartwüschen un achterna ward dat ok mal fründlich mit een beten Sünn – bi 2 bit 5 Graad. Tokamen Nacht treckt vun de Nordsee Schuers över dat Land, an de Küst as Regen or Sneeregen, in’t Binnenland överall as Snee. Dat kann glatt weern! Dat Thermometer sackt op plus 2 bit 0 Graad op de Eilanden un an de Küst un minus 1 bit minus 2 Graad in’t Binnenland. Morrn sünd veele Wulken ünnerwegens, de jümmer wedder Schuers bringen köönt, to’n Deel ok as Snee – bi 2 bit 4 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.