Plattdeutsche Nachrichten Plattdüütsche Narichten vun'n 27. Dezember 2024

Bunnspräsident will Weg för Neewahlen freemaken

Berlin: Bunnspräsident Frank-Walter Steinmeier will in en halv Stünn sein Ordeel to dat Oplösen vun’n Bunnsdag bekanntgeven. Dat gellt as wohrschienlich, datt he tostimmen ward. Dormit weer denn de Weg free för de Neewahlen an’n 23. Februar.

Flegergesellschaft striekt Linien na Moskau na Afstört

Tel Aviv: De israeelsche Flegergesellschaft El Al hett all Linien na Moskau för düsse Week instellt. Grund dorför sünd de „Entwicklungen in’n russ’schen Luftruum“, as se seggt. Dat gifft Henwiesen dorop, datt de Passageerfleger ut Aserbaidschan vun en russ’sche Floogafwehrrakeet afschaten worrn is. As Medien vermellt, sünd to de Tiet, as de Fleger afstört is, in mehreren Regionen vun’n Noordkaukasus ukrainsche Drohnen attackeert worrn. Dorbi sünd 38 Minschen dootbleven, 29 hebbt överleevt.

Meist twee vun dree Krankenhüüs maakt Minus

Berlin: De Krankenhüüs in Düütschland geiht dat finanziell so leeg as siet 20 Johr nich. Dat hett dat Redakschoonsnetwark Düütschland vermellt un will dat vun en Ümfraag vun de Düütschen Krankenhuusgesellschaft weten. 61 Perzent vun de Krankenhüüs hebbt in’t verleden Johr Minus maakt. Dat liggt woll an de högeren Kosten för Personaal un Utstatten.

Hüerslüüd un Eegner sünd mit Mietenspegel tofreden

Bremen: De in Bremen nee inföhrte Mietenspegel hett dorto föhrt, datt dat weniger Striet twüschen Hüerslüüd un Eegners gifft. Na Angaven vun’n Mietervereen Bremen is dat Hoochsetten vun de Hüern dorüm woll düütlich weniger kontrolleert worrn. Ok de Eegnerverband „Huus un Grund“ hett seggt, datt dat so is. De Eegners hebbt mit den Mietenspegel mehr Sekerheit bi dat Fastleggen vun de Hüer.

Dode bi Unfall in’n Kreis Cloppenborg

Barßel: In’n Landkreis Cloppenborg is en junge Autofohrersch to Dode kamen. De 19-Johrige hett de Kontroll över ehren Lüttwagen verloren un is mit en Auto ut’n Gegenverkehr tosamenstört. Se weer in ehr Auto fastklemmt un is noch an de Unfallsteed dootbleven. De Lüüd in’t anner Auto, en 38-johrige Fohrersch un dree junge Lüüd, sünd swor versehrt in’t Krankenhuus bröcht worrn.

Dat Weer

Un nu en Blick op dat Weer: In Möppen 2, in Bremen un Bremerhaben 3, un in Cuxhaben sünd dat opstünns 4 Graad. Hüüt hollt sik faken dichte Feller mit hogen Daak. An de Noordsee un de Elv kann dat noch’n poor Druppen oder lichten Spütterregen geven. Anners blifft dat meisttiets dröög, un vun Middag an kann in’n Süüden vun Bremen ok mal de Sünn rutkamen bi 5 bet 8 Graad. In de Nacht gifft dat veele dichte Feller mit Daak un hogen Daak. Tovör kann dat na Noordrhein-Westfalen hen noch oplockern, an de Noordsee sünd’n poor Druppen oder lichter Spütterregen mööglich bi 6 bet 1 Graad. Morgen is dat gries oder dakig, un dat hellt meist gor nich op. Över Dag treckt vun de Noordsee her Spütterregen in’t Land. Dat Thermometer wiest 2 bet 6 Graad. An’n Sünndag överall Wulken mit hogen Daak un hier un dor’n beten Spütterregen bi 5 bet 8 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.