Plattdeutsche Nachrichten Plattdüütsche Narichten vun'n 18. Juni 2024

Top-Drapen bi de EU

Brüssel: Bi jemehr Top-Drapen hebbt sik de Böversten vun de EU-Staaten un Regerungen noch nich enigen kunnt, wokeen na de Europawahl de wichtigsten Posten kriegt. Raatspräsident Michel sä: Se mööt dor noch wieder över snacken. Dat heet ok: Noch is nich kloor, wat EU-Kommischoonspräsidentin von der Leyen för en twete Amtstiet opstellt warrt. Seggt warrt: De konservativen Parteien wüllt jemehr egen Lüüd mehr in hoge Ämter rinbringen.

De Nato un dat 2-Perzent-Mark

Washington: Düütschland un en Reeg anner Nato-Länner kriegt düt Johr dat Twee-Perzent-Mark faat. Dat hett Nato-Generalsekretär Jens Stoltenberg seggt, as he mit US-Präsident Biden tohoopkamen is. Vun de 32 Liddmaten warrt dat woll 23 schaffen. Dat heet: 2 Perzent vun dat Brutto-Inlands-Produkt geeft se för Verteidigung ut. Düütschland weer jümmers wedder bekriddelt worrn, wo se dat nich umsett harrn.

Warnstreik bi Radio Bremen

Bremen: Siet fröh an’n Morgen maakt vele Mitarbeiderinnen un Mitarbeiders bi Radio Bremen mit bi en Warnstreik. Dat markt een ok an de Programme vun Radio Bremen. De Warnstreik löppt noch bet in de Middagstiet. Wat dor achter stickt: Över de Tarifen verhannelt just de Gewarkschaften mit Radio Bremen oder ok mit dat Produkschoons-Unnernehmen Bremedia.

Perzess gegen Rieksbörgers

München: Vundaag fangt noch en Perzess an gegen en Koppel um den Geschäftsmann Prinz Reuß, de woll to de Rieksbörgers tohören doot. Tosamen sünd dat 26 Lüüd, de se vörsmiet, se hebbt de Bunnsregerung afsetten wullt. Vundaag staht acht Lüüd vör’t Brett. Noch twee Perzessen loopt al. So steiht al en poor Weken in Frankfort Reuß vör’t Gericht, vun den se meent, he is de Baas.

Football-EM

Düörpm: Vundaag geiht de Football-Europameisterschap för de letzten veer Mannschaften los. De Törkei speelt vun Klock sess in Düörpm gegen Georgien. De sünd dat eerste Mal bi en EM mit bi. Klock 9 mutt Tschechien in Leipzig gegen Portugal ran. Güstern Avend hett Frankriek mit 1:0 gegen Österriek de Bavenhand hatt.

Dat Weer

Un woans süht dat mit dat Weer umto ut? Opstunns hebbt wi in Weyerbarg 17 Graad, in Bremen un Bremerhaven sünd dat 18 un in Cloppenborg 19 Graad. Vundaag: Eerst hell un kloor, ok mit Sunnschien. Över Dag ballt sik de Wulken aver mehr un mehr tohoop, un vun’t Ollenborger Mönsterland treckt Schuer na Noordoosten, gewiddern kann dat ok, vör allen süüdlich vun Bremen kann dat mächtig pladdern. Ok an de See treckt de Wulken tohoop, man hier blifft dat noch lange Tiet dröög. Dat Thermometer krabbelt op 18 bet 22 Graad. De Wind dorto weiht flau. He dreiht vun de süden na de noorden Kant. Wenn’t gewiddert, ok mit däägte bet störmsche Böen. Tokamen Nacht: De Avendregen leggt sik över dat hele Land, treckt denn aver na Middernacht na de Aller un de Lümborger Heid af. Nich ünner 14 bet 12 Graad. Morgen: Wenn de dichten Wulken na Oosten aftrocken sünd: Mal Sunnschien, mal opstiegen Wulken, ut de dat aver nich pladdert. Bi 16 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Jan Siegert.