Plattdeutsche Nachrichten Plattdüütsche Narichten vun'n 26. Juni 2024

Wikileaks-Grünner Julian Assange is achterna dat Gerichtsordeel free

Canberra: Wikileaks-Grünner Julian Assange is op den Weg na Australien. En US-Richtersche harr em vörweg op de Marianen-Insel Saipan in den Pazifik to fief Johren un twee Manden achter Trallen, vunwegen Spionaasch, verordeelt. De Straaf harr he aver al in Grootbritannien afseten un so hett de Richtersche em op freen Foot sett. Dat hebbt de Afkaaten vun Assange vörher mit de US-Justiz in en Deal afmaakt.

Utlänner de finnen dat terroristsche Saaken goot sünd, schüllt lichter afschaven warrn

Berlin: Utlänner, de in Düütschland finnen, dat terroristsche Saaken goot sünd, schüllt in Tokunft lichter afschaven warrn. Dat Kabinett will hüüt noch en passlich Regel besluten, see Binnenministersch Nancy Faeser to de Bläder vun de Funke-Mediengrupp.

Finanzprobleme bi dat Jobcenter: Bremer Wiederbillungsinrichtung sünd bang vör Verknappen

Bremen: Wiederbillungsinrichten in de Stadt sünd bang böös Insneed hentonehmen, na den Födderstopp vun dat Jobcenter. Achterna en Drapen, hett nu de Verbund vun arbeitsmarktpolitsch Deenstleister verlangt: De Bunnsagentur för Arbeit un de Stadt Bremen mööt sik an Tosaag holen, de se eerst maakt harrn. Dat Johrsbudget för Ut- un Wiederbillen is opbruukt, hett Freedag dat Jobcenter künnig maakt.

Pleeghuusgrupp Hansa is woll rett

Ollenborg: De Hansa Grupp mit Pleeghüüs in Bremen un Neddersassen is woll rett. De Insolvenzverwalter hett künnig maakt, dat achterna de Glöviger, nu ok dat Gericht den Saneerplaans tostimmt hett. De Pleeghuusgrupp weer vör een Johr bankrott un hett sik denn ut egen Kraft weertschoplich nee opstellt. To de Hansagrupp höört fief Pleeghüüs in Bremen un twee in Bremerhoben, wiedere Pleeghüüs sünd in Stuhr-Brinkum, Ollenborg un Willemshoben.

84-Johriger bi Verkehrsunfall doot bleven

Stuhr-Brinkum: Güstern Avend is en Mann bi en Verkehrsunfall doot bleven. Na de Polizei hett de 84-Johrige in en Böögde de Kuntrull över sien Wagen verloren, woso is noch nich kloor. He hett böös wat afkregen un keem in en Krankenhuus, dor is he denn aver sturven. De Polizei see, de Mann harr woll kien Föhrerschien.

Dat Weer

Un nu kiekt wi op dat Weer: In Möppen sünd dat 22 Graad, in Bremen, Bremerhoben un Emm hebbt wi opstunns 23 Graad. Hüüt lacht den ganzen Dag de Sünn, hier un dor sünd en poor lüüte Wulken ünnerwegens, man dat blifft dröög, heet un ok bruttig warm bi 28 bet 31 Graad in´t Binnenland un 23 bet 27 Graad op de Eilannen. In de Nacht wedder blots lütte Wulken un wi köönt de Steerns funkeln sehen, dat blifft bruttig warm bi 20 Graad an de Küst un 19 bet 17 Graad in´t Binnenland. Morgen eerst lachen Sünnenschien, vun Middag af an twuschen Werser un Elv wedder bruttig warm mit Gewidder un denn pladdert dat ok böös, Hagel un Störmbö sünd ok mööglich, man dat kann ok Watersnööd geven. In Westen blots hier un dor Schuer un Gewidder. Dat Thermometer wiest us 29 bet 31 Graad in´t Binnenland un 25 bet 28 Graad an de Küst.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.