Plattdeutsche Nachrichten Plattdüütsche Narichten vun'n 25. Juni 2024
Standdatum: 25. Juni 2024.
Informationen zum Audio
- Verfügbar bis: 25. Juni 2025 Informationen zur Verweildauer
Buer finnt Kinnerliek op en Wisch in Staad
Estorf: En Buer hett bi’t Meihen vun en Wisch güstern Namiddag in’n Landkreis Staad de Liek vun en Kind funnen. Dat hett de Polizei vermellt, ahn datt se wietere Angaven maakt hett. Lüüd vun de Ermittlungsgrupp Arian hebbt den Fundoort na Angaven vun de Fahnder ünnersöcht. Siet April ward de Jung söcht, de 6 Johr oolt un autistisch is. Sien Öllernhuus in Bremführ-Elm is blots’n poor Kilometer wiet weg. Opstünns is aver noch nich klaar, wat sik dat bi düsse Liek würklich üm den Jungen hannelt.
Neeis in Fall vun Wikileaks-Grünner Julian Assange
London: In’n Fall vun Wikileaks-Grünner Julian Assange gifft dat, as dat schient, en Afkamen mit de amerikaanschen Justiz. So will sik Assange bald schüllig bekennen, datt he gegen dat Spioneer-Gesetz vun de USA verstött hett. Dorför drauht em denn keen Haft mehr in de USA, un he draff wedder trüch in sien Heimat Australien. Assange weer över Johren in Grootbritannien achter de Trallen. He hett in’t Johr 2010 hunnertdusende vun geheeme Paperen vun dat amerikaansche Militäär to Insatzen in Afghanistan un den Irak bekannt maakt.
EU-Bitrittsverhanneln mit Ukraine un Moldau fangt an
Luxemborg: De europääsche Union fangt hüüt dat Verhanneln över dat Bitreden vun Ukraine un Moldau an. Wo lang düt Verhanneln duern ward, is noch nich klaar. As utslaten gellt aver, datt de Ukraine in de EU bitreden kann, solang de Krieg mit Russland noch anduert. Dat Land mutt eerst de Oplagen vun de EU inlösen, to’n Bispill beter gegen Korrupschoon angahn.
Bremer Pendler stunnen 2023 länger in’n Stau as de Bunnsdörsnitt
Bremen: Minschen in Bremen hebbt in’t verleden Johr all tohoop 45 Stünnen in’n Stau stahn. Dat is länger as de Dörsnitt in heel Düütschland. Dat kann en ut Informatschonen vun den Verkehrsdaten-Deenstleister Inrix rutlesen. So is de Tiet, de de Minschen in’n Stau oder dicken Verkehr tobröcht hebbt, länger worrn as in’t Johr tovör. De mehrsten Staus gifft dat in Berlin, Stuttgart un München. Veele Staus gifft dat ok jümmers noch in Hamborg bi‘n Elvtunnel.
Football-Europameisterschaft: Italien ünner de letzten 16
Leipzig: Bi de Football-Europameisterschaft is Italien as Winner vun’t letzt Mal ünner de letzten 16 kamen. De Italiener hebbt an’n Avend 1:1 gegen Kroatien speelt. Dat Toor hebbt de Italiener eerst kort vör’t Enn schaten. In de Grupp B hett Spanien wunnen, na dat se 1:0 gegen Albanien speelt hebbt.
Dat Weer
Un nu en Blick op dat Weer: In’t Wangerland 19, in Bremerhaben 20, in Bremen 21, un in Nienborg sünd dat opstünns 23 Graad. Hüüt gifft dat noch mehr Sünnschien as güstern, dorto blots’n poor lockere opstiegen Wulken, besünners in’t Binnenland. De Temperaturen stiggt wieter op 26 bet 29 Graad in’t Binnenland, direktemang an de Küst op 22 bet 25 Graad. In de Nacht funkelt meisttiets de Steerns an’n Heben. Dat blifft lau bi 18 bet 14 Graad. Morgen gifft dat ok wedder veel Sünnschien, un in’t Binnenland bildt sik över Dag‘n poor opstiegen Wulken. Dat blifft dröög un warm, aver ok’n beten bruttig bi 27 bet 31 Graad in’t Binnenland, op de Eilannen un an de Küst bi 23 bet 26 Graad.
Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.