Plattdeutsche Nachrichten Plattdüütsche Narichten vun'n 27. Juni 2024

Bunnsdag snackt över Krankenhuusreform

Berlin: De Bunnsdag snackt an’n Middag to’n eersten Mal över de plaante Krankenhuusreform. De Plaan vun Gesundheitsminister Lauterbach schall dat Versorgen vun Patschenten verbetern un to glieke Tiet afsekern, woher de Krankenhüüs dat Geld kriggt. Dorto schüllt sik de Krankenhüüs stärker spezialiseern un nich mehr elkeen Operatschoon anbeden. Ut de Länner kummt veel Kritik an de Reform.

Staats- un Regerungsböversten stimmt över dat nee’e EU-Toppersonaal af

Brüssel: Bi dat EU-Topdrapen, dat hüüt anfangt, wüllt de Staats- un Regerungsböversten doröver afstimmen, wokeen de böversten Ämter in de EU na de Europawahl övernehmen schall. As meist seker gellt en twete Amtstiet vun Kommischoonspräsidentin von der Leyen. To Gast bi dat Drapen is de ukrainsche Präsident Selenskyj. He schall dorbi ween, wenn de EU dat Sekerheitsverspreken för Kiew ünnerschrifft.

Habenmitarbeiders an’n Containerterminal Willemshaben streikt

Willemshaben: De Gewarkschaft Verdi hett de Mitarbeiders an’n Containerterminal Willemshaben för hüüt to’n Lawai för Wohrschau opropen. Dorachter stickt dat Tarifverhanneln för de düütschen Seehabens. De Gewarkschaft will 3 Euro per Stünn mehr un högere Schichttolagen. De Arbeitgevers hebbt betto tominnst 80 Cent per Stünn mehr Lohn un mehr Urlaubsgeld un högere Toslääg anbaden.

Weltruumbahnhoff in de Noordsee geiht later an’n Start

Bremerhaben: De Test-Misschoon för en egen düütschen Weltruumbahnhoff in de Noordsee fangt nu doch nich in de tokamen Week an. Se is korthannig op dat tokamen Johr rutschoven worrn, denn England hett noch nich sien Verlööf dorto geven. De Raketen, de ünner annern lütte Satteliten in’t Weltall bringen schüllt, mööt över dat englische Seeflach fleegen. Se schüllt vun en Schipp ut starten. As Heimathaben kummt Bremerhaben in Fraag.

Utstellungsschipp „MS-Wissenschaft“ maakt in Bremen fast

Bremen: Dat Utstellungsschipp „MS Wissenschaft“ wiest vun hüüt an Saken to dat Thema Freeheit. Hier köönt sik Besökers to’n Bispill ankieken, wat Künstliche Intelligenz för de Freeheit vun elkeen enkelten Minschen bedüden deit. Dat Schipp liggt an de Tiefer, un de Utstellung köst nix. Wietere Statschonen sünd Bremerhaben un Ollenborg. De „MS Wissenschaft“ is in’n Namen vun’t Bunnsbillungsministerium in Düütschland un Österriek ünnerwegens.

Dat Weer

Un nu en Blick op dat Weer: In Cuxhaben 22, in Bremerhaben 24, in Bremen 25, un in Leer sünd dat opstünns 26 Graad. Hüüt schient eerst för lange Tiet de Sünn. Vun Middag an bildt sik besünners twüschen Werser un Elv in de bannig bruttigen Luft ok degte Schuers un Gewidder. Dorto gifft dat starken Regen, hier un dor ok mit Hagel un Stormböen. Ok rusig Weer is mööglich, dat Hoochwater mit sik bringen kann. Wieter in Westen bildt sik blots enkelte Schuers un Gewidder, womööglich blifft dat sogar dröög bi 29 bet 31 Graad, an de Küst bi 25 bet 28 Graad. In de Nacht treckt de letzten Schuers un Gewidder över de Elv af. Darna gifft dat mal mehr, mal weniger Wulken. Vun de Nedder-lannen un de Noordsee her treckt noch enkelte Schuers dör, hier un dor ok mit Gewidder. Dat blifft lau un bruttig bi 18 bet 16 Graad. Morgen treckt enkelte Schuers gau na Oosten af. Hier un dor is dat ok noch bruttig. Darna gifft dat en Wessel ut Sünn un Wulken, un dat blifft meisttiets dröög. An de Küst sünd noch enkelte Schuers bi 19 bet 20 Graad mööglich, in’t Binnenland 21 bet 24 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.