Plattdeutsche Nachrichten Plattdüütsche Narichten vun'n 24. Juni 2024

Football-EM: Düütschland speelt unentscheden un ward Gruppensieger

Frankfort an’n Main: Bi de Football-Europameisterschaft hett de düütsche Natschonaalmannschaft in de Grupp A wunnen. Gegen de Swiez hebbt se güstern 1:1 speelt. Dat Toor to’n Utgliek för de Düütschen hett de fröhere Bremer Füllkrug eerst in de Nachspeeltiet schaten. Dat tokamen Speel vun de DFB-Mannschaft is an’n Sünnavend. Wokeen de Gegner ward, steiht noch nich fast. In dat twete Speel in de Grupp A hett Ungarn gegen Schottland mit 1:0 wunnen.

Bunnsdag snackt över nee’e Regeln bi Organspenn

Berlin: De Bunnsdag snackt opstünns över dat Thema Organspenn. Mehrere Afordnete ut verscheden Frakschonen wüllt en Reform. Se wüllt en so nöömte Inspruchslösung inföhren. Dat würr bedüden, datt düütlich mehr Börgers Organspenner ward, wenn se nich nipp un nau dorgegen sünd. Betto gellt, datt en bi Minschen na den Dood blots Liefdelen ruthalen draff, wenn se vörher kloor un düütlich tostimmt hebbt.

Bunnskanzler Scholz: Toversicht för Landdagswahlen in’n Oosten

Berlin: Bunnskanzler Scholz sett dor op, datt dat na de Landdagswahlen in mehrere oostdüütschen Bunnslänner keen Ministerpräsidenten vun de AfD geven ward. Scholz säe in’t ARD-Sommer-Interview, datt en Regerungsböverster vun de AfD bannig verstörend weer. He is aver toversichtlich, datt de annern Parteien de Mehrheit in’n Landdag hebben ward. In’n September gifft dat Landdagswahlen in Thüringen, Sassen un Brannenborg. In Ümfragen liggt de AfD opstünns in all düsse Länner vörn.

Hen un her üm Betahlkart för Flüchtlinge geiht wieter

Bremen: Dat Diskuteern över de Betahlkart för Flüchtlinge geiht wieter. Se schüllt in Bremen in Tokunft bet to 120 Euro in’n Maand in boor afheben könen, un dormit mehr as in anner Bunnslänner. Dat bekrittelt blangen de CDU nu ok de FDP. Se is bangen, datt dorüm noch mehr Flüchtlinge na Bremen kamen ward. De Senaat wiest dat trüch un maakt kloor, datt de Flüchtlinge in Bremen nich mehr Geld as woanners kriggt. Se köönt sik blots mehr in boor utbetahlen laten.

Hurricane-Festival in Scheeßel is vörbi

Scheeßel: Dat Hurricane-Open-Air-Festival is an’n Avend to Enn gahn. Na Angaven vun de Veranstalters sünd in de verleden dree Daag all tohoop üm un bi 75.000 Minschen op dat Flach kamen. Dat weern meist so veel as in’t verleden Johr. 90 Musikgruppen sünd optreden. Polizei un Veranstalters maakt düütlich, datt allens bannig friedlich aflopen is.

Dat Weer

Un nu en Blick op dat Weer: In Bremerhaben un Möppen 17, in Cuxhaben 18, in Bremen 19, un in Demhorst sünd dat opstünns 22 Graad. Hüüt is dat an de Küst eerst’n beten dakig, later gifft dat aver ok dor veel Sünnschien. In’t Binnenland schuuvt sik jümmer mal wedder’n poor opstiegen Wulken vör de Sünn, aver dat gifft keen Regen. Dat ward mooi warm mit 18 bet 20 Graad an de Noordseeküst un 22 bet 26 Graad in’t Binnenland. In de Nacht löst sik de Wulken gau to’n gröttsten Deel op, un dat klaart meist överall op. Hier un dor kann dat ok mal Kruupdaak geven. Dat Thermometer sackt daal op 16 bet 11 Graad. Morgen gifft dat wedder veel Sünnschien un över Dag blots’n poor lockere opstiegen Wulken, besünners in’t Binnenland. De Temperaturen stiggt wieter op 26 bet 29 Graad in’t Binnenland, op de Eilannen un an de Küst op 22 bet 25 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.