Plattdeutsche Nachrichten Plattdüütsche Narichten vun'n 28. Juni 2024

Wirtschaftsthemen bestimmen eerste TV-Duell twüschen Biden un Trump

Washington. Goot veer Maand vör de Wahl vun dat Präsidentenamt in den USA hebbt sick Joe Biden, de den Posten hett, un sien Wedderpart Donald Trump en eerste TV Duell levert. Dorbi hebbt se sick to´n Deel Vörholden un Schimps üm de Ohren smeten. Hauptthemen weern aver Fragen to de Wirtschaft. Biden verkloor, he hett, as he dat Amt in de Hand nohmen hett, en Wirtschaft övernohmen, de in den freen Fall weer. Trump dorgegen funn gode Wöör för sien Amtstiet.

Von der Leyen schall wedder EU-Kommischoon föhren

Brüssel. De EU-Staats- un Regerungsböversten hebbt bi ehr Drapen de düütsche CDU-Politikersche Ursula von der Leyen för en tweete Amtstiet as Kommischoonspräsidentin opstellt. De fröher portugiesisch Regerungsbaas Antonio Costa vun den Sozialdemokraten schall den Posten vun den Ratspräsidenten övernehmen. De estnisch Regerungsböverste Kaja Kallas warrt woll neje EU-Butenbeopdragte.

Lüüd för de Datensekerheit bekriddeln Överwachen mit Video bi Breminale

Bremen. De Lannsbeopdragte för Datensekerheit süht dat plante Överwachen mit Video vun de Breminale in de tokamen Week „bannig kritisch“. De Behörde geiht nich dorvun ut, dat dordör Strafdelikten verhinnert or opkloort weern. Dat see en Vertreder to buten un binnen. To desülvige Tiet makt sick de Behörde Sorgen üm de Rechte vun de Besökers. An´n Dingsdag schall sick de Binnendeputatschon över dat plante Överwachen mit Video fastleggen.  

Bremen makt Hölp för neemoodsch Heizung grötter

Bremen. Wer sien Heizung uttuuscht, kann vun nu an noch en Hölp kriegen. De Vörschrift dorför is güstern in dat Amtsblatt bekannt makt wurren un gellt dormit af vundag. As de Ümweltsenatorsche Kathrin Moosdorf vermellt, ünnerstütt dat Förderprogramm vun Bremen al de bekannten Angebotten vun den Bund.

CDU vun Bremen verlangt Aktschoonsplan för Hitten

Bremen. De CDU hett den Senat dorför bekriddelt, dat dat jümmer noch kien Aktschoonsplan för Hitten gifft. CDU-Fraktschoons-Viez Martin Michalik smiet de Lannsregerung vör, de Börgerslüüd mit noch mehr Ankünnigen hentohollen. Michalik verlangt gau kloore Regeln un en grodet Konzept mit mehr Schaddenplätz, mehr Gröön un Borns mit Drinkwater.

Dat Weer

Un nu noch en Blick op dat Weer: In Hooksiel, in Bremen-Mitt un in Bremerhaben 19 un in Demorst sünd dat opstunns 20 Graad. Vundag gifft dat en Wessel ut Sünnschien un opstiegen Wulken. Dat blifft meist dröög. Enkelte swacke Regenschuer sünd viellicht an de Küst möglich. De Wind weiht in Maten un dat Thermometer wiest 19 bit 20 Graad op de Eilannen un 22 bit 24 Graad in´t Binnenland. In de Nacht sünd lockere Wulken an´n Heven un dat blifft dröög. De Temperaturen gahn op negen bit 15 Graad daal. Morn kriegt wi en moje Sommerweer mit Sünnschien un lockeren Wulken. Dat blifft dröög bi 21 bit 27 Graad. Sünndag: En rusig Weer. Veele Wulken mit degten Regenschuern bi 18 bit 22 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Markus Weise.