Plattdeutsche Nachrichten Plattdüütsche Narichten vun'n 4. Juli 2024

Parlamentswahlen in Grootbritannien löppt

London – In Grootbritannien ward hüüt een nee’et Parlament wählt. Na 14 Johren an de Macht draut den konservativen Tories vun Premier Sunak een historisch Nedderlaag. Ümfraag seht de sotschaldemokratische Labour-Partei mit ehrn Toppkandidat Starmer mit een dütlich Afstand vörn.

Bunnesdag prööft Utstieg ut de Atoms

Berlin – Mehr as een Johr na denn de letzten dree dütschen Atomkraftwarke in Dütschland afschalt worrn sünd, geiht de Bunnesdag de Fraag na, of allens mit rechten Dingen togahn is. Darto kummt een Ünnersökensutschuss vun’n Bunnesdag tohoop. De Union smiet Bunnesümweltministersche Lemke un Bunneswertschuppsminister Habeck vör, een mööglich Wieterbedreev vun Atomkraftwarken nich so prööft to hebben, dat dat Ergevnis open weer.

Se sünd sik eenig worrn in’n Tarifstriet för Banken

Berlin – In’n Tarifstriet bi de privaten Banken in Dütschland hebbt sik Gewarkschupp un Arbeitgeversiet eenigt. Dat hett de Gewarkschupp Verdi vermellt. De Arbeiders kriegt nu also vun’n 1. August an in dree Schreden tohoopnahmen 10,5 Perzent mehr Geld. För junge Minschen schüllt de Löhns üm tohoop 250 Euro na baben gahn.

Bund stellt goot een Viddelmillion Euro för Löschboot 1 praat

Bremen – De Bund stellt goot een Viddelmillion Euro praat, üm dat „Löschboot 1“ in’n Haben vun Vegebüdel wedder op Schick to bringen. Dat hett de Huusholtsutschuss vun’n Bunnesdag besluten. Dat Löschboot is 1941 in Hamborg boot worrn, leeg na den Krieg in Bremerhaben un steiht ünner Denkmalschutz. Wenn dat Schipp wedder fardig is, schall dat wedder in’n Museumshaben vun Vegebüdel liggen.

Bunnesliga-Speelplaans ward bekannt geven

Frankfurt an’n Main – De Dütsche Football Liga gifft an’n Middag de Speelplaans för de tokamen Speeltied in de 1. un 2. Bunnesliga bekannt. Dat geiht los an’n 23. August. Werder Bremen much de Saison lever mit een Utwärtsspeel anfangen, wiel se dat Werser Stadion nu noch ümboot.

Dat Weer

Un nu een Blick op dat Weer: in Bremen 15, in Bremerhaben, Deefholt un op Wangerooge sünd dat opstunns 16 Graad. De Regen treckt bit to’n Middag meist af. Darachter wesselt sik Sünnschien un Quellwulken af un dat gifft blots noch verenkelt Schuers, meist twüschen Oostfreesland un de Elv – bi köhlen 16 bit 19 Graad. Tokamen Nacht wiest sik de Heben erst meist licht wulkig or klaar. Later treckt aver Wulken dör, de ok mal Schuers bringen köönt. Direktemang an de Küst un op de Eilanden gifft dat mehr Wulken mit verenkelt dullen Schuers or korten Grummelschuers. Dat Thermometer sackt op 13 bit 9 Graad. Morrn schient erst faken de Sünn un dat is dröög, blots af un an mal wulkiger. An de Küst un op de Eilanden kann dat wieter natt vun baben kamen. Vun’n Middag an ward de Wulken överall dicker un dat kann Regen geven bi 17 bit 20 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.