Plattdeutsche Nachrichten Plattdüütsche Narichten vun'n 8. Juli 2024

Dütsche Politiker sünd froh na Frankriek-Wahl

Berlin – Vele dütsche Politiker sünd froh, woans de Wahl in Frankriek utgahn is. De dull rechte Partei „Rassemblement National“ vun Marine Le Pen is blots op Platz dree kamen. Wunnen hett een Maatschupp vun Linksparteien. De Partei vun Präsident Macron keem op Platz 2. Premierminister Attal harr noch an’n Wahlabend ankünnigt, trüchtopedden. Nu weet aver nümms, woans de tokünftig Regeern utsütt, wiel keen Partei een Mehrheit hett.

US-Präsident Biden maakt mit sien Wahlkampf wieter

Washington – US-Präsident Biden maakt mit sien Wahlkampf wieter, obschoons he na een Fernsehduell mit sien Gegenspeler Trump orrig bekrittelt worrn is. Parteifrünnen un Lüüd vun Bidens Demokraten sünd mehr un mehr bang, dat de 81-jöhrige för een tweete Amtstied nich kregel noog is. In’n Bunnesstaat Pennsylvania hett Biden in een Kark snackt, Wahlhölper besöökt un mit Lüüd Fotos maakt.

Orban reist to’n Snacken na China

Peking – De Regeernbaas vun Ungarn, Orban, besöökt op sien so nöömte Freedensmischoon nu China. Dar will he mit Staats- un Parteibaas Xi Jinping snacken. Dat is all de drütte Reis in’t Utland, wo nümms mit rekent hett, siet Ungarn Anfang Juli dat Leit över de EU-Ratspräsidentschupp övernahmen hett. Dat Amt wesselt all söß Maand. Vördem harr Orban de Ukraine un Russland besöökt. Sien Reis na Moskau is vun annern EU-Littmaten orrig bekrittelt worrn.

Dütlich weniger Besöker op de Breminale

Bremen – To de Breminale sünd in dütt Johr 160-dusend Besööker kamen, dat sünd dütlich weniger as in’t letzte Johr. Dat slechte Weer, veel Matsch, aver ok de Football-EM hebbt darto föhrt. As de Veranstalter vermellt, sünd de Tallen in’n Vergliek to verleden Johr üm bold een Drüttel inbroken. Güstern güng dat Festival to Enn. Ut Sicht vun Polizei un Füerwehr weer dat een ruhiger letzter Dag.

Werder Bremen maakt sik praat vör de Bunnesliga

Bremen – Football-Bunnesligist Werder Bremen fangt mit dat erste öffentlich Training an, üm sik för de nee’e Bunnesliga-Saison praat to maken. Tokamen Week fohrt de Mannschupp in ehr Trainingslager in’t Zillertal. Denn ward ok de Speler, de bi de EM weern, darto kamen. Vördem gifft dat all dat erste Testspeel: tokamen Sünndag in Veern gegen den FC Veern 04.

Dat Weer

Un nu een Blick op dat Weer: op Wangerooge 16, in Bremerhaben 18 un in Bremen un Deefholt sünd dat opstunns 19 Graad. Hüüt Vörmiddag ward dat kort överall fründlich un dröög. Man dar kummt nee’e Quellwulken op, de sik vör de Sünn schuuvt. An’n Namiddag kann denn ok Regen fallen – bi 19 bit 24 Graad. Tokamen Nacht treckt to’n Deel dicke Wulken dör, dat blifft aver meist dröög. To’n Morrn hen riet de Heben wedder op. Dat Thermometer sackt op 16 bit 12 Graad. Morrn schient för een länger Tied de Sünn bi lockeren Quellwulken. An’n Namiddag ward de hier un dar dicker, dat blifft aver noch meist dröög. De Luft ward bruttig bi 22 bit 26 Graad an de Küst un 27 bit 30 Graad in’t Binnenland. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.