Plattdeutsche Nachrichten Plattdüütsche Narichten vun'n 9. Juli 2024

Guterres verurdeelt Angriepen op Ukraine

Kiew – Dat russische Angriepen op de Ukraine is güstern op de hele Welt orrig bekrittelt worrn – vör allens wiel een grodet Kinnerkrankenhuus drapen worrn is. Lanneswiet sünd mehr as 30 Minschen üm’t Leven kamen, tominnst 130 sünd versehrt worrn. UN-Generalsekretär Guterres sä, dat Völkerrecht verbeedt direktet Angriepen op Börger un nich militärische Steden. Dat wees nich hentonehmen un müss batz op de Stäe ophören.

Fohrgastverband wahrschaut vör dürem Dütschlandticket

Berlin – De Fohrgastverband „Pro Bahn“ hett vör een to hoget Na-Baben-Kladdern vun de Priese bi’n Dütschlandticket wahrschaut. Verbandsbaas Neuß sütt de Gefohr, dat vör allens nee’e Kunnen dardör afschreckt ward. De Verkehrsminister vun de Länner sünd sik eenig, dat dat 49-Euro-Ticket in’t tokamen Johr dürer weern mutt.

Mann starvt bi Füer in Flüchtlingsünnerkunft

Buchholz in de Nordheid – Bi een Füer in een Ünnerkunft för Flüchtlinge is güstern een 28-jöhriger Äthiopier sturven. 20 wietere Minschen sünd versehrt worrn, darünner ok twee Polizisten. In de Ünnerkunft kann nu nümms mehr wahnen. As de Polizei vermellt, weer de 28-Jöhrige ok de Füerpüster – man woso he dat daan hett, weet noch nümms.

Streik in’n Hamborger Haben

Hamborg – De Gewarkschupp Verdi hett mehr as 5-dusend Arbeiders in’n Hamborger Haben an’n Morrn to Streiks to’n Wahrschaun opropen. Se will darmit mehr Drock op de Arbeitgever vör de nöchste Runn to’n Verhanneln vun de Tarife för de Arbeiders vun de dütschen Seehabens maken. Snackt ward Donnerdag un Freedag. De Gewarkschupp foddert ünner annern, de Stünnenlöhns üm dree Euro na baben to setten.

Spanien un Frankriek speelt üm dat Intrecken in’t EM-Finale

München – An’n Abend finndt dat erste Halffinalspeel vun de Football-Europameisterschupp statt. Darbi dreept Spanien un Frankriek opeenanner. Dat tweete Halffinale Nedderlanne gegen England löppt morrn in Dortmund. De Sieger speelt an’n Sünndag in’t Finale in Berlin gegen eenanner.

Dat Weer

Un nu een Blick op dat Weer: op Wangerooge 18, in Deefholt  22 un in Bremen un Bremerhaben sünd dat opstunns 23 Graad. Vundaag schient erst för een länger Tied de Sünn bi lockeren Quellwulken, an’n Namiddag ward de hier un dar dicker, dat blifft aver meist dröög - bi 22 bit 26 Graad an de Küst un 27 bit 30 Graad in’t Binnenland. Tokamen Nacht is dat erst noch dröög, later kummt Schuers un Grummelschuers op un dat ward bruttig. Dat Thermometer sackt nich veel op 20 bit 18 Graad. Morrn treckt de Regen in Richt Elv af, darbi kann dat wieter orrig natt vun baben kamen. Achternah wesselt sik Sünn un Wulken af, man dat kann jümmer wedder ok mal schuern – bi 22 bit 27 Graad. Dat weern de Narichten op Platt. Justus Wilke hett se tohoopstellt. Op platt trechtmaakt un vörleest hett se Heidi Jürgens.