Plattdeutsche Nachrichten Plattdüütsche Narichten vun'n 26. August 2024

Na Attack mit Metz: Bunnskanzler Scholz besöcht Solingen

Solingen: Dree Daag is de Atack mit en Metz her. Nu sünd Bunnskanzler Olaf Scholz un de Ministerpräsident vun Nordrhein-Westfalen Hendrik Wüst na Solingen fohrt. Se gaht na de Steed, woneem dat passeert is un snackt mit Sekerheitslüüd. Middewiel geiht dat Hen un Her doröver wieder, wat na den Anslag nakummt. Bi de Attack mit en Metz weren in Solingen dree Minschen to Dode kamen, annern weren an't Lief to Schaden kamen.

Snacken över Freden in den Nehgen Oosten: Keen Spier na vörn

Kairo: Dat lett: Bi dat Snacken över keen Scheten mehr in’t Gaza-Land geiht dat nich wieder. Seggt warrt: De Afordnung ut Israel un de Vertreders vun de Hamas sünd al wedder afreist. Vörher harrn Ägypten, Katar un de USA versöcht, den Middelsmann to spelen. De Hamas harr verlangt, Israel schull sien Militär heel un deel ut den Gaza-Striepen un de Grenzen dor aftrecken. In düssen Punkt kunnen se nich op een Brett kamen.

Bahnlinie Hannover – Hamborg: Keen Plaan för Utboo

Hannover: De Bahnlinie twüschen Hamborg un Hannover schall woll nich groot utboot warrn. Dat vermellt de NDR un de weet dat vun en Breef ut dat Bunnsverkehrs-Ministerium. Dor steiht to lesen: Se plaant dor blots lüttere Arbeiten, as ne’e Wieken inboen. Vörher harr Neddersassens Verkehrs-Minister Olaf Lies verlangt: Wo dor veel to veel Verkehr löppt, müss dat ok en grötteren Utbo geven.

Touristenpunkt op Island tohoopfullen

Reykjavik: In Island is en Ieshöhl tohoopfullen. Twee Minschen sünd böös verletzt worrn, na twee söökt se noch. En Koppel vun 25 Touristen harr sik de Höhl bi en Rundgang ankeken. Woso de Höhl instört is, weet se noch nich. De Höhl liggt an en See in’t süüdööstliche Island. De swemmen Iesbargen dor treckt vele Urlaubers an.

Football-Bunnsliga: Sankt Pauli un Wolfsborg verleert

Hamborg: De FC Sankt Pauli is in de Football-Bunnsliga opstegen. Nu hett de Vereen dat eerste Speel verloren. To Huus hett Heidenheim jem 0 to 2 afrüüscht. In dat twete Speel an’n Sünndag harr vörher de FC Bayern bi den VFL Wolfsborg mit 3:2 de Bavenhand hatt.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Cloppenborg 15 Graad, in Bremen un Weyerbarg sünd dat 16 Graad. Vundaag: Mal Sunnschien, mal Wulken, un vun Middag op an pladdert dat ok mal twüschen de Ems un de Waterkant. Anners blifft dat dröög un hell un fründlich. Dat Thermometer krabbelt op 20 bet 23 Graad. De Wind dorto weiht flau oder en beten mehr vun de süüdwesten Kant, na de See hen ok frisch un mit deegte Böen. Tokamen Nacht: Vele Wulken, aver doch dröög. Bi 16 Graad op de Inseln, anners 12 bet 9 Graad. Morgen: Sunnschien satt, ok wenn över Dag en poor lockere Wulken dortokaamt. Dat Ganze bi 23 bet 27 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Kück.