Plattdeutsche Nachrichten Plattdüütsche Narichten vun'n 15. Oktober 2024

UN-Sekerheitsraat maakt sik Sorgen wegen Attacken op UN-Truppen

New York: De Weltsekerheitsraat hett kritiseert, datt in’n Libanon op Stellungen vun de UN-Fredenstruppen schaten worrn is. In en Verkloren hett dat Gremium all Parteien dorto opropen, dat minschliche Völkerrecht to achten. In de verleden Daag sünd Blauhelmsuldaten bi Schetereen twüschen Israel un de Hisbollah in’n Libanon jümmer wedder attackeert worrn.  

Polens Regeern snackt över Utsetten vun Recht op Asyl

Warschau: Polens Regeern will nu för en Tiet en P vör dat Recht op Asyl setten. Künnig maakt hett Ministerpräsident Tusk düssen Schritt al an’t Weekenenn op en Parteidag vun sien liberaalkonservative Börgerkoalitschoon. In en Kabinettssitten schall hüüt en Kurs för den Ümgang mit dat Inwandern gegen dat Gesetz vörstellt warrn.

Frankforter Bookmess fangt an

Frankfort: Fief Daag lang dreiht sik in de Stadt wedder allens um Böker, denn de 76. Frankforter Bookmess fangt an. Se rekent dor mit meist 4.000 Utstellers un Hunnertdusende vun Besökers. Gastland is in dütt Johr Italien. Güstern Avend is al de Düütsche Bookpries vergeven worrn, un twars an Martina Hefter för ehren Romaan „Hey, guten Morgen, wie geht’s dir?“

Tarifverhanneln för noorddüütsche Metall- un Elektroindustrie geiht in Bremen wieter

Bremen: Dat Tarifverhanneln för de noorddüütsche Metall- un Elektroindustrie geiht wieter. Dat geiht dorbi üm mehr as 130.000 Mitarbeiders. In Bremen sitt de Arbeitgevers un Gewarkschaften nu to’n tweten Mal tohoop. Bi de eerste Runn vun’t Verhanneln in Hamborg sünd se sik nich enig worrn. De IG Metall will söben Perzent mehr Geld un 170 Euro mehr in’n Maand för de Lehrlinge. De Arbeitgevers hebbt betto keen Angebott vörleggt.

Waterschutzpolizei in Bremen un Neddersassen kontrolleert Frachtscheep

Bremen: Ünner dat Motto „Maritime Safety Days“ kontrolleert de Waterschutzpolizei in Bremen un Neddersassen vun hüüt an besünners Frachtscheep. Mehr as een Week lang bekiekt sik de Beamten de Scheep nipp un nau un prüüft ünner annern, wat all Paperen dor sünd un wat se sik an de Sekerheitsvörschriften hollt. Wat dorbi rutsuert, ward Enn Oktober vörstellt.

Dat Weer

Un nu en Blick op dat Weer: In Deefholt 1, in Bremen 4, in Emmen 5, un in Bremerhaben un Cuxhaben sünd dat opstünns 8 Graad. Hüüt löst sik bet to’n Middag de Feller mit Daak un hogen Daak op. Darna gifft veel Sünnschien un blots’n poor dünne oder flache opstiegen Wulken. Dat blifft dröög, un bet to’n fröhen Namiddag warmt sik dat op 12 bet 13 Graad op. In de Nacht is dat eerst klaar oder licht wulkig, later treckt vun‘t Emsland her’n poor Wulkenfeller op. Dat blifft aver dröög bi 8 bet 4 Graad. Morgen gifft dat en dröög Gemengsel ut Sünnschien un af un an dichtere Wulken. Dorbi ward dat’n beten lauer as toletzt mit 13 bet 16 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.