Plattdeutsche Nachrichten Plattdüütsche Narichten vun'n 17. Oktober 2024

Top-Lüüd vun Regerungen in Europa snackt över’t Inwannern

Brüssel: De Baaslüüd vun de Staaten un Regerungen in de Europääsch Union snackt bi jemehr Top-Drapen över dat Inwannern. Kommischoons-Präsidentin Ursula von der Leyen hett en Plaan mit teihn Punkten op den Disch leggt. Dor geiht dat ok um strengere Regeln för’t Afschuven. Dat Drapen löppt twee Daag lang. Ok de ukrainsche Präsident Wolodymyr Selenskyj is bi dat Drapen mit bi. Vörstellen will he sien „Plaan to’n Winnen“, de hölpen schall, de Attacken ut Russland aftowehren.

Kandidatin för US-Präsidentenamt Harris will ehren egen Politik-Kurs stüern

Washington: Kamala Harris, se is för de Demokraten de Kandidatin för dat US-Präsidentenamt, hett kloormaakt: Wenn se wählt warrt, denn warrt se ehren egen politischen Kurs stüern. Dat geiht nich eenfach so wieder, as dat nu bi Präsident Joe Biden löppt, sä se in’t Fernsehn. Middewiel hett de fröhere US-Präsident Jimmy Carter sien Stimm al bi de Breefwahl afgeven. Ut sien Familie weer to hören: Carter is vör twee Weken 100 Johr oolt worrn. He is böös krank, man he wull dat uthollen un op jeden Fall sien Krüüz bi Harris maken.

Mieten-Brems schall dree Johr länger lopen

Berlin: De Brems för Mieten schall dree Johr länger lopen, also bet Enn 2028. So steiht dat in en Plaan vun dat Bunnsjustiz-Ministerium binnen. Egens harr de Ampel dat al in’n April afsnackt. Man denn harrn sik vör allen de SPD un de FDP in’nanner verkielt. Nu liggt en neen Gesetz-Plaan op’n Disch. Ok in Tokunft schall gellen: Dat Mietgeld för Wahnungen, de al dor sünd, dröfft nich mehr as teihn Perzent över dat normale Mietgeld in de Gegend liggen.

Airbus striekt Arbeitssteden – mag ween ok in Bremen

Bremen: Wo Airbus anseggt hett, se warrt 2.500 Arbeitssteden wegstrieken, mag ok wat in dat Bremer Wark wegfallen. Wat dor achter stickt: De Weltruumfohrt- un Rüstungs-Part „Airbus Defence and Space“ hett Milliarden an rode Tallen schreven. En Spreker sä: Woneem de Arbeitssteden wegfallt, dat hannelt se mit de Vertreders vun de Arbeitnehmers ut. In Bremen boot se dat Mittelstück för den Airbus-Militärfleger A400M tohoop.

Börger-Service-Centers in Bremer: Bet veer Maand töven op en Termin

Bremen: Bet veer Maand – so lang duert dat opstunns, bet Froens- un Mannslüüd ut Bremen en Termin bi de Börger-Service-Centers kriegt. De Anfang September en Andrag för en Reisepass oder Personal-Utwies stellen wull, müss an de Steden Mitt, Stresemannstraten un Bremen-Nord bet 117 Daag op en Termin töven. Wenn een sien Wahnung ummelllen wull, hett dat to’n Deel 130 Daag duert. Woso dat so is: De Senat sä: Op’t Amt hebbt se to wenig Lüüd.

Dat Weer

Un woans süht dat mit dat Weer umto ut? Opstunns hebbt wi in Bremen 11 Graad, in Bremerhaven, Deefholt un Hooksiel sünd dat 12 Graad. Vundaag: Twüschen Werser un Ems vele Wulken un hier un dor kann dat ok pladdern. Ööstlich vun de Werser is dat heller un dröög. Un dor lacht us an’n Vörmiddag ok noch de Sunn. Dat Thermometer krabbelt op 17 bet 20 Graad. De Wind dorto weiht flau oder en beten mehr vun de süüdoosten bet süden Kant. Tokamen Nacht: Mal mehr, mal weniger Wulken, hier un dor ok daakig-gries. Twüschen Ems un Werser kann dat ok en beten druppeln. Bi 14 bet 10 Graad. Morgen: Mehr Wulken as Sunnschien. Eerst noch daakig-gries, un westlich vun de Werser kann bet Middag ok noch de een oder anner Schuer daalkamen. Achteran dröög. Bi 16 bet 19 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Weingärtner.