Plattdeutsche Nachrichten Plattdüütsche Narichten vun'n 21. Oktober 2024

Islamist na Anslagplaan in Ünnersökenshaft

Karlsroh: De 28-johrige Mann ut Libyen, de en Anslag mit Wapen op de israeelsche Baadschop in Berlin plaant hebben schall, sitt nu in Ünnersökenshaft. De Bunnsgerichtshoff hett en Haftbefehl utschreven. Na Angaven vun en Ermittlungsrichter hett he sik tovör in’t Internet mit en Liddmaat vun de Terrororganisatschoon IS över sien Plaan uttuuscht. De Mann is ehrgüstern in Bernau bi Berlin fastnahmen worrn. De verhinnerte Anslag hett to nee’e Debatten twüschen Bunnsregeern un Oppositschoon över dat Sekerheitspaket vun de Ampel föhrt.

Wahlen in Moldau: Prowestliche Kandidatin vör Prickwahl

Chisinau: Bi de Präsidentenwahl in de Republik Moldau liggt de prowestliche Maia Sandu vörn, de dat Amt nu ok al hett. Se hett 38 Perzent vun de Stimmen kregen. Na dat, wat bet nu bi de Wahl rutkamen is, mutt se aver in en Prickwahl, wohrschienlich gegen en russland-fründlichen Kandidaat, de op 29 Perzent kamen is. Sandu klaagt över en düchtige Wahl-Manipulatschoon. Se snackt vun kriminelle Gruppen, de woll versöökt hebbt, de Demokratie to ünnergraven, un gifft Russland dorför de Schuld.

EU-Ministers snackt över Fischfang-Mengde in Oostsee

Luxemborg: De tostännigen EU-Ministers wüllt vun hüüt an doröver snacken, woveel Fisch in’t tokamen Johr in de Oostsee fangen warrn draff. De Europääsche Kommischoon will de Fangmengde wieter in Schranken setten. So schüllt sik de Fischbestänn wedder verhalen. De düütschen Oostseefischers sünd dorüm bang, datt ehr wirtschaftliche Laag leger ward.

Tourismus-Wirtschaftsfeld in’n Norden betto tofreden

Ollenborg: Dat Tourismus-Wirtschaftsfeld in Neddersassen is mit de Nafraag na Hotels un Pensionen betto tofreden. In’n Harz weern’n poor Oortschaften beter bookt as in’t Vörjohr. In de Lünborger Heid weern de Quarteren to 90 Perzent utlast. An de Küst un op de Eilannen weern de Kamern to’n Anfang vun de Ferien na Utkunft vun DEHOGA in Oostfreesland mit 70 bet 90 Perzent ok al goot bookt. Se haapt aver op Gäst ut Noordrhein-Westfalen, wo noch Harvstferien sünd.

Werder Bremen winnt bi’n VfL Wolfsborg

Wolfsborg: Football-Bunnsligist Werder Bremen hett noch mal wedder bi en Buten-Speel wunnen. De Bremer hebbt an’n Avend bi’n VfL Wolfsborg mit 4 to 2 de Nääs vörn hatt. Dormit stiggt Werder op den 8. Platz in de Tabell. In’t twete Sünndagsspeel hett Holstein Kiel tohuus gegen Union Berlin mit 0 to 2 verloren. In de Düütschen Ieshockey-Liga hebbt de Fischtown Pinguins ut Bremerhaben dat Topspeel in Ingolstadt mit 2 to 4 verloren.

Dat Weer

Un nu en Blick op dat Weer: In Bremerhaben un Leer 13, in Emmen 14, in Bremen 15, un in Dörveern sünd dat opstünns 16 Graad. Hüüt is dat meisttiets wulkig, un besünners vun’t süüdliche Emsland över dat Bremer Flach bet in’t Oole Land fallt’n beten Regen. An de Noordsee is dat faken dröög, aver de Sünn wiest sik ok wenig. Vör allen an’n Namiddag fallt ok dor’n beten Regen. De Temperaturen stiggt op 16 bet 18 Graad. In de Nacht gifft dat veele Wulken, aver af un an blifft dat eerst noch dröög. Vun’t Emsland un vun’t Ollenborger Münsterland kummt aver later mehr Regen op. Dat Thermometer sackt daal op 12 bet 9 Graad. Morgen is dat eerst gries mit veel Regen. De treckt aver bet to’n Middag na Oosten af. Denn lockert dat vun Oostfreesland un vun’t Emsland her op, so datt dat an’n Namiddag un Avend fründlich ward. Vör allen direkt an de See kann dat noch enkelte lichte Schuers geven bi 14 bet 16 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.