Plattdeutsche Nachrichten Plattdüütsche Narichten vun'n 23. Oktober 2024

Bunnswirtschaftsminister Habeck plant neje Hölpen för Wirtschaft

Berlin. Bunnswirtschaftsminister Robert Habeck will op den flauen Verloop vun de Wirtschaft in Düütschland reageren un Ünnernehmen mit Milliarden ünner de Arms griepen. De „Bild-Zeitung“ vermellt, dat Habeck över en Staatsgeld nadenkt, de bi Investitschonen en Stütt geven schall. So schall to´n Bispill en Ünnernehmen, dat en Maschien för 10.000 €uro köfft, 1.000 €uro vun den Staat torüchkriegen. Enkelte Delen will Habeck vundag vörstellen.

EU-Parlament snackt över Migrationspolitik

Brüssel. Dat EU-Parlament snackt in Ogenblick mit Vertredern vun de EU-Kommission över de gemensame europäische Asyl- un Migrationspolitik. Konkret schall dat dorüm gahn, wo dat schafft weern kann, dat weniger Migranten na Europa kaamt un mehr aflehnte Asylbewarver de EU wedder verlaat. In ganz Europa liggt de Weert vun dat Afschuven vun Minschen ohn Recht to blieven bi rund 18 Perzent. Ut de Staaten, de Liddmaten sünd, kaamt vele Vörslääg, wo dat höger makt weern kann.

Daalbrennen Karktorn vun de Dionysius-Karn in Bremerhaben kann wedder opboot weern

Bremerhaben. De daalbrennen Karktorn vun de Dionysiuskark in den Stadtdeel Lehe kann wedder heel un deel opboot weern. De Karkenvörstand hett vermellt, dat de Versekerung toseggt hett, de Kösten to övernehmen. Ok en Stiftung gifft rund theindusend Euro för den Wedderopbo dorto. Vör en Week hett en Füer den Kartorn vun de öllste Kark in Bremerhaben twei makt. As dat lett, hett en technische Fehler dat Füer utlöst.

800. Stolpersteen in Bremen verlegt

Bremen. In Walle is jüst de 800. Stolpersteen verleggt wurrn. De in den Bodden verleggde Messing-Gedenktafel wiest in Tokunft  in de Arndtstraat an de jöödsch Familie ter Berg hen. Se wurr an´n 18. November 1941 na Minsk deporteert un ümbrocht. Dat Stolpersteen-Projekt vun den Künstler Gunter Demnig wiest siet mehr as dartig Johr an Opfers vun den Natschonalsozialismus hen. Man jeedmal an den letzen Wahnoort vun de Minschen. In de Stadt Bremen wurren de eersten Gedenksteen vör twintig Johr verleggt. In Bremerhaben gifft dat betto 136 Stolpersteen.

Waterschutzpolizei sleppt havererte Segelboot af

Bremen. Mit dat Morgenhoochwater hett de Waterschutzpolizei en havarerte Seilschipp in den Hohentorshaven sleppt. Dat thein Meter lange Segelboot weer an´n Avend in de Hööchde vun dat fröher Kellogg´s-Grundstück op en Steenwall oplopen un droh ünner to gahn. De Füerwehr harr de twee Schippslüüd an Land brocht. Wegen de Ebb kunn dat Boot in de Nacht nich freesleppt weern.  

Dat Weer

Un nu noch en Blick op dat Weer: In Ollenborg un in Bremen-Mitt negen, in Bremerhaben thein un in Meppen sünd dat opstunns acht Graad. Vundag gifft dat en drögen Mischmasch ut Sünnschien un Wulken. Hier un dor blifft de hoge Daak bit to´n Middag. De Wind weiht en beten. An de Küst in Maten vun de Süüdwesten Kant. Dat Thermometer wiest 14 bit 16 Graad. In de Nacht sünd de Wulken locker an´n Heven. Nevel stiegt blots hier un dor op. Veer bit thein Graad stahn denn op dat Thermometer. Morn gifft dat – wenn de Nevelfeller weg sünd – en Harvstweer mit Sünnschien. Dat blifft dröög bi 14 bit 16 Graad. Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.