Plattdeutsche Nachrichten Plattdüütsche Narichten vun'n 24. Oktober 2024

Regereensbaas snacken över Migratschoon un Rundfunk-Reform

Leipzig: De Ministerpräsidenten vun de Länner drapen sik hüüt in Leipzig to jümehr Johreskunferenz, üm över scharpere Maatregeln to dat begrenzen vun unregelmatigen Migratschoon to snacken. Verlangt warrt ünner annern Torüchwiesen an de Grenz un Asylverfohren buten Länner de EU. Dorto snacken de Ministerpräsidenten ok över de apentlich-rechtlich Rundfunk-Reform. Blangenbi Insnidden bi Programm- un Online-Anbotten warrt ok över Rundfunkbridrääg snackt.

Türkei griept na Attack PKK-Steeden an

Ankara: Achterna de Attack op en wichtig Rüstünnernehmen bi Ankara hett de töörksch Luftwapen Telen in Syrien un den Noord-Irak angrepen. De töörksch Regerung meent de PKK is Schuld an de Attack. Dat Wehrministerium maakt künnig: De Armee hett över 30 Steeden vun Kriegers, de to de terroristisch PKK tohöörn evenso vun de Lüüd de an ehre Siet stahn, kaputtmaakt. Twee Minschen hebbt dat Rüstünnernehmen angrepen un sik in´ne Luft jaagt, dorbi sünd tominns fief annere Minschen sturven, 22 weren versehrt.

Internatschonaale Kunferenz in Paris snackt över Libanon-Hölp

Paris: In de franzöösch Hööftstadt fangt hüüt de internatschonaale Hölpskunferenz för den Libanon an. Vertreder vun 70 Staaten un verscheeden Hölpsorganisatschoon wüllt över Stütt för de Minschen in Noot un den Wedderopbo vun dat Land beraaden. Düütschland hett al 60 Millioon Euro toseggt. Dör den Negen Oosten-Krieg un de Kämp twuschen Israel un de Hisbollah sünd in den Libanon hunnertdusende Minschen ut ehre Hüüs verdrieven wurrn.

Bremen bruuk vunwegen marood Straaten mehr Geld

Bremen: De Stadt Bremen bruukt mehr Geld, üm kaputte Straaten wedder torechttomaken. 3,5 Millioon Euro schüllt bavento praatstellt warrn, üm de Schadens dör Winter un Hoochwater kloortokriegen. Dat steiht in en Papeer för de Verkehrsdeputatschoon an Namiddag. Wieder warrn dorbinnen ünner annern söven Straaten un Krüüzen nöömt, de so marood sünd, dat se dwingend noch düt Johr saneert warrn mööt. Man ok Schadens, de dat Hoochwater bi den verleden Johrswessel anricht hett, schüllt instand sett warrn.

Justizministerium rekent bold mit Anklaag gegen Ex-RAF-Terroristin Klette

Veern: De wohrschienliche Ex-RAF-Terroristin Daniela Klette warrt woll in den tokamen Weken anklaagt, hett neddersassens Justizministersche Kathrin Wahlmann künnig maakt. Wohrschienlich mutt Klette för dat Gericht in Veern. Vunwegen de hooge Tahl an Nevenklägers un ehre Afkaaten warrt mehr Platz as normaal bruukt, meent Wahlmann. De Staatsafkaatschop Veern smitt Klette verscheedene swore Roven un versöchten Moord vör.

Dat Weer

Un nu kiekt wi op dat Weer: In Möppen sünd dat fief Graad, in Bremen söss un in Bremerhoben un Emm hebbt wi opstunns söven Graad. De Dag fangt mit Daak un hoogen Daak an, meist is dat dröög. Övern Dag kloort de Daak op un de Sünn schient en beten, hier un dor is dat liekers wiederhen diesig un dat bi veerteihn Graad op de Eilannen un fofteihn bet sössteihn Graad in´t Binnenland. In de Nacht sünd en poor Wulken an Heven, man dat blifft liekers dröög bi ölven Graad op de Eilannen un acht bet söven Graad in´t Binnenland. Freedag fangt wedder mit hoogen Daak an, de aver över de Noordsee aftreckt. Övern Dag wesseln sik Sünn un Wulken af, un dat blifft dröög bi foffteihn Graad op Langeoog un söventeihn bet achteihn Graad in´t Binnenland.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.