Plattdeutsche Nachrichten Plattdüütsche Narichten vun'n 25. Oktober 2024

Stüerkalkulatschoon sorgt för Diskuschoon

Berlin: De aktuelle Stüerkalkulatschoon sorgt för wiederen Striet in de Ampel-Koalitschoon. Bunnsfinanzminister Christian Linder bekriddelt an Avend in´t ZDF, de körtens wertschopspolitschen Vörslääg vun Kanzler Olaf Scholz un Wertschopsminister Robert Habeck weren nich mit em afsnackt. Linder hett de Fraag opbrocht, of de Koalitschoon so noch tohoop kamen kann. Habeck hett Middeweken en schullenfinanzerte Investischoonsprämie vörslahn, üm de Wertschop antoschuven. Man Lindner meent bi de aktuelle Stüerkalkulatschoon is de Speelruum vun den Bund limiteert.

Lännerbaas beraden över Asylpolitik un Rundfunkrefoorm

Leipzig: De Ministerpräsidenten-Kunferenz geiht hüüt in de sächschen Hööftstadt toenn. En groodet Thema is de Migratschoonspolitik. In´ne Hauptsaak verlangen de unionföhren Länner en hatteren Kurs. Se drängt op en Bavergrenz för Asylbewarber un mehr torüchwiesen an de Grenz. Buterdem snacken de Lännerbaas över en Reformpapeer för den apentlich-rechtlichen Rundfunk. Hüüt middag schall dat, wat bi dat Drepen rutsuert is, vörstellt warrn.

Scholz un verscheeden Bunnsminister drepen indische Regerung

Neu Delhi: Kanzler Olaf Scholz un verscheeden Bunnsminister kamen hüüt mit den indischen Regerungsbaas Narendra Modi un sien Kabinett in Neu-Dehli tohoop. Snackt warrt över den Betog toeenanner, üm internatschonaale Politik un ok över den Ümgang mit Russland. Indien hett engde Kuntakten to Russland un to den Westen – un gellt as mööglichen Middelsmann bi diplomaatsch Streven üm en Enn vun den Ukraine-Krieg.

Stööraktschoon bi Israel-Mahnwacht sorgen för Debatt in Bremer Binnendeputatschoon

Bremen: Mit den massiven Störaktschoon gegen en Mahnwacht för Offers vun dat Hamas-Blootbad an 7. Oktober hett nu de Binnendeputatschoon in Bremen to doon. Dorbi geev dat veel krietsche Fraagen an Polizei un Behördenvertreder. Binnensenator Ulrich Mäurer hett an Enn togeven, dat man de Laag verkehrt inschätz hett. Nu geiht dat dorüm, dat richtige dorut to lehren.

Meyer-Warft levert nee´t Krüüzfohrtschipp ut

Papenborg: De Meyer-Warft hett ehr nee´t Krüüzfohrtschipp utlevert. De „Disney Treasure“ wurr binah een Week ehrder övergeven as plaant. De eersten Fohrgäst dröfft al in Dezember an Bord gahn. Dat Krüüzfohrtschipp löppt mit Nattgas un hett Platz för bet to veerdusend Gäst.

Dat Weer

Un nu kiekt wi op dat Weer: In Emm hebbt wi negen Graad un in Bremen, Bremerhoben un Möppen hebbt wi opstunns teihn Graad. Hüüt wesseln sik Sünn un Wulken af. In Richten Aller lacht meist de Sünn, dorgegen trecken vun´t süüdliche Emsland bit Ostfreesland un na de Wersermünn an Vörmiddag un över Middag dicke Wulkenfeller dör un dat kann ok mal kort pladdern. An Namiddag trecken de Wulken den över de Noordsee af un dat blifft meist dröög bi fofteihn Graad op de Eilannen un söventeihn bet achteihn Graad in´t Binnenland. In de Nacht köönt wi de Steerns funkeln sehen, hier un dor drängeln sik en poor Wulken dorvör. Man ok Daak un hoogen Daak dükert wedder op. Dat Thermometer wiest us twolf Graad op Spiekeroog un teihn bet söven Graad in´t Binnenland. Sünnavend fangt daakig an, övern Dag wesseln sik Sünn un Wulken af un dat blifft dröög bi lauen sössteihn bet achteihn Graad. Sünndag wedder Sünn aver ok dicke Wulken, hier un dor en beten Regen bi veerteihn bet sössteihn Graad. Tokamen Week kriegt wi en Wesselspeel ut Daak, Wulken un Sünn, man drüppeln kann dat ok mal, bi darteihn bet fofteihn Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.