Plattdeutsche Nachrichten Plattdüütsche Narichten vun'n 1. Juli 2024

Macron un Linke kämpft üm de Macht

Paris – In Frankriek kämpft Rechtsnatschonale un börgerliche Parteien na de erste Runn vun de Parlamentswahl üm de Macht in’t Land. De Rechtsnatschonalen üm Marine Le Pen hebbt de mehrsten Stimmen kregen un hoopt op de afsolute Mehrheit in de Natschonalversammlung. Präsident Macron un dat linke Lager wüllt versöken, dat mit een gemeensam Front bi de Prickwahlen an’n nöchsten Sünndag to verhinnern.

Vereene to’n Anboo vun Cannabis köönt losleggen

Berlin – Na de Freegaav vun Cannabis för grootwussen Lüüd in Dütschland passeert vundaag de tweete Schreed. Vun nu an draff dat ok Anboo-Vereene mit bit to 500 Littmaten geven, de darmit man keen Geld verdeenen dröfft. Vulljöhrig Lüüd köönt dar tohoop Cannabis anboon un ünnereenanner to’n sülfstbruken afgeven.

Heiz-Geld för Bremens Scholen woll opbruukt

Bremen – Dat Bremer Billenressort hett woll dat Geld för dat Heizen vun de Scholen opbruukt. Dat is de Antwurt vun’n Senat op een Anfraag vun de CDU. Darna harr de Behöörd för dütt Johr mit 5,9 Millionen Euro Kosten för’t Füern vun de Heizungsanlaags rekent. All nu liggt de Kosten bi 8,3 Millionen Euro und dat Johr hett noch söß Maand. De Behöörd weer woll darvun utgaan, dat de Kosten för Energie dütt Johr dull sinken ward.

Plicht to Solar-Anlaags bi nee Maken vun Dacks

Bremen – Huusbesitter mööt in Tokunft een Photovoltaikanlaag anbringen, wenn se ehr Dack nee maakt. So steiht dat in’t Bremische Solargesett, dat vun hüüt an gellt. Wokeen een Huus nee boot, för den gellt dat Gesett erst een Johr later. In düssen Fall mutt denn tominnst de Hälft vun‘t Dack solar nutzt weern.

Streiks bi Banken in’n Nordwesten

Bremen – De Gewarkschupp Verdi roopt Lüüd, de in Bremen un Neddersassen in Banken anstellt sünd, vundaag to Streiks to’n Wahrschaun op. Bedrapen sünd darvun ünner annern Steden vun de Sparkass, de Commerzbank un de Dütsche Bank. De Gewarkschuppen foddert för private un öffentlich Banken 12,5 Perzent mehr Geld – de Arbeitgever hebbt 8,5 bit 9,5 Perzent anboden.

Dat Weer

Un nu een Blick op dat Weer: in Bremen un Deefholt 15, in Bremerhaben un op Wangerooge sünd dat opstunns 16 Graad. De Regen treckt hüüt Vörmiddag sinnig af un darachter gifft dat een Mix ut Sünn, Wulken un blots verenkelten Schuers, dat blifft fakener mal een beten dröög. An’n Namiddag un Abend kummt aver dicke Quellwulken op un dat schuert fakener, kann ok een Grummelschuer mit darbi ween – bi 17 bit 19 Graad. Tokamen Nacht regent dat wieter. Dat Thermometer sackt op 15 bit 12 Graad. Morrn hollt sik faken dicke Wulken an’n Heben, de jümmer wedder Schuers bringt. De Regen treckt aver later na Süden af un an’n Abend sett sik vun de Nordsee her een beten de Sünn dör. Dat ward köhl bi 16 bit 18 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.