Plattdeutsche Nachrichten Plattdüütsche Narichten vun'n 16. Oktober 2024

USA bekrittelt Israel för Situatschoon in Palästinenserlandstücken

Gaza. De USA hebbt de lege Situatschon in´n Gazastriepen bekrittelt. Butenminister Antony Blinken un Pentagon-Baas Lloyd Austin repen de israelisch Regeren in en Breef op, mehr Hölp för de Minschen totolaten. Beide wohrschauten Israel bavento dorvör, dat wat dor achterher kümmt, wenn de Mengde vun de Hölpsfrachten för de Palästinenser nich binnen dartig Dag mehr warrt.

Lufthansa to Straafgeld wegen Corona-Regeln verordelt

Washington. Dat US-Verkehrsministerium hett gegen de Lufthansa en Straafgeld wegen dat minnachtig Ankieken vun jöödsch Fluggäst utsproken. Veer Millionen Dollar mutt de Lufthansa betahlen. Dat geiht üm en Vörkamen in de Corona-Tiet. De Lufthansa harr 128 jöödsch reisen Lüüd in Frankfurt dat Wiederfohren vun New York na Budapest verseen. Achtergrund weer, dat en poor Liddmaten vun de orthodoxschen Koppel aflehnt harrn, en FFP twee Mask an Boord to dregen. De Lufthansa wurr vörsmieten för dat verkehrte Benehmen vun enkelten Lüüd, all Fluggäst bestraft to hebben, wiel düsse „ogenschienlich jöödsch“ weern.

Sekerheitspaket vun de Regeren op den Weg

Berlin. Noch in düsse Week will de Ampelkoalitschon ehr Sekerheitspaket dör den Bunnsdag bringen. Dat süht Metzen-Verbott, mehr Rechte för Sekerheitsbehörden un en strenger Asylrecht vör. Vunnamiddag schall de Binnenutschuss vun den Bunnsdag de Gesetzplans fastleggen. De Union geiht dat allens nich wiet noog – in de „Ampel“ gifft dat Bedenken in de annere Richt: Bunnskanzler Olaf Scholz harr sick güstern in de SPD-Fraktschon schienbor mit düütlich Wöör för dat Sekerheitspaket insett. De Nawassorganisatschon vun de SPD roopt aver dorto op, dat Paket aftolehnen. Juso-Baas Philipp Türmer smiet den Kanzler vör, Kritiker ünner Druck sett to hebben.

Stellenafbo bi Bremer Klinikverbund

Bremen. De Klinikverbund Gesundheit Nord will womööglich bit to 120 Doktor-Steden afboen. Dorvör wohrschaut de Doktorverband Marburger Bund. 80 vulle Arbeitssteden in dat Klinikum Bremen-Mitt un 40 wiedere in dat Klinikum Ost könen streken weern. En Geno-Sprekersche see to den Weser Kurier, dat dat wohr is. För rund 120 Arbeitssteden fehlt dat Geld. De Verbund hööpt aver, Geld för en Deel vun de Steden noch dör Verhanneln to kriegen.   

Füer in Bremerhaben Karktorn

Bremerhaben. Na dat Füer in de Dionysiuskark in Wulsdörp is de Ursaak noch nich kloor. In de Nacht weer de histoorsche Karktorn utbrann. De Füerwehrlüüd kunnen aver verhinnern, dat dat Füer op de ganze Dionysiuskark övergreep. Of de Klock in dat Dachstockwark noch seker hangt mööt nun Fachlüüd pröven.   

Dat Weer

Un nu noch en Blick op dat Weer: In Nordholde söss, in Bremen-Mitt söven, in Bremerhaben acht un in Bassen sünd dat opstunns söven Graad. Vundag gifft dat en drögen Mischmasch ut Sünnschien un vun de Westen Kant her dichte Wulken. De Wind weiht in Maten. An de Küst frische bit starke Wind vun de Süüdoosten Kant. Dat Thermometer wiest 13 bit 17 Graad. In de Nacht sünd de Wulken locker an´n Heven, hier un dor kann man ok de Sterns funkeln sehn. Dat blifft dröög bi negen bit 12 Graad. Morn gifft dat in dat Weser-Ems-Land vun dat Emsland her vele Wulken. Hier un dor kaamt dat en beten Natt vun baven. In´n Oosten vun de Weser schient en beten mehr de Sünn un dat blifft dröög. 16 bit 20 Graad stahn denn op dat Thermometer.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Markus Weise.