Plattdeutsche Nachrichten Plattdüütsche Narichten vun'n 14. Oktober 2024

CDU un FDP bekrittelt Stüerplaans vun de SPD

Berlin – CDU un FDP bekrittelt de Vörslääg vun de SPD, üm grode Deele vun’t Volk bi de Stüern nich so to belasten. 95 Perzent vun de Stüertahler schüllt weniger Stüern tahlen möten un dat eene Perzent vun de Minschen, de an’n besten verdeent, schüllt mehr tahlen. CDU-Baas Merz is de Meen, dat dat för de Leistungsdräger un den Middelstand een to grode Last ward. FDP-Baas Lindner smiet de SPD vör, sik mit ehr Plaans vun de Sotschale Marktwertschupp to verafscheden.

Europäisch Butenpolitiker foddert Wapenstillstand in’n Oosten Blangenbi

Luxemborg – Vör dat Drepen vun de EU-Butenminister in Luxemborg hebbt de EU-Butenbeopdragte Borell un de britische Butenminister Lammy een Enn vun de Kämpfe in’n Oosten Blangenbi foddert. Se wöörn sik tohoop för een Freeden op Duer in dat Flach insetten. To de glieke Tied maakt de beid Topp-Politiker nochmal dütlich, dat Isreal dat Recht hett, sik sülfst to verdeffenderen. Ünnerdess sünd bi een Angrepen mit Drohns vun de libanesisch Hisbollah-Miliz op een israelisch Armeestützpunkt veer Suldaten üm’t Leven kamen.

Ärmste Staaten hebbt so veel Schullen as lang nich

Washington – De 26 ärmsten Länner vun de Welt hebbt so vele Schullen as siet 2006 nich mehr. Dat vermellt de Weltbank. De Schullenstand vun düsse Länner liggt nu in’n Snitt bi 72 Perzent vun’t Bruttoinlandsprodukt: in de Corona-Pandemie harrn se hoge Schullen opnahmen. In düsse 26 Staaten, de ünnersöökt worrn sünd, leevt üm un bi 40 Perzent vun de Weltbevölkerung.

Olben Minschen versehrt bi Füer in een Geisterbahn

Leer – In de Stadt hett güstern een Geisterbahn Füer fungen. Olben Minschen sünd darbi dör Rookgase versehrt worrn, darünner ok Mitarbeider. Dree Versehrte sünd in’t Krankenhuus kamen. Opstunns weet se noch nich, woso de Geisterbahn brannt hett, dat Füer is aver gau doot kregen worrn. De Gallimarkt is dat gröttste Volksfest in Oostfreesland mit 19 groden Fohrgeschäften un rund 250 Marktstännen in de Binnenstadt vun Leer.

Krögers treckt erste Bilanz to de Halftied bi de Harvstferien

Ollenborg – To de Halftied vun de Harvstferien in Bremen un Neddersassen weet de Tourismusbedreeve an de Küst un op de Eilanden noch nich, wat ünnern Streek stahn ward. Vun de Ferienwahnungen un Hotels weern 60 bit 80 Perzent vull, so de Hotel-un Gaststedenverband Dehoga in Oostfreesland. Dat geev noch överall free’e Kamern. Besünners de Restaurangs wöörn spören, dat de Geldbüdel bi de Lüüd nich mehr so locker sitt.

Dat Weer

Un nu een Blick op dat Weer: in Bremen, Bremerhaben un Deefholt 8, op Wangerooge sünd dat opstunns 12 Graad. Vundaag verdeckt vele Wulken de Sünn un vun’n Vörmiddag an fallt af un an een beten Regen. Darbi ward dat fakener an de Nordsee natt – in’t Binnenland kann dat ok mal länger dröög blieven. To’n Avend hen lockert de Wulken vun’t Emsland un Ollenborger Münsterland her mehr un mehr op – bi 11 bit 13 Graad. Tokamen Nacht is de Regen meist all heel un deel to de Elv hen aftrocken. Darachter is de Heben klaar un de Sterns funkelt. To’n Morrn hen billt sik hier un dar dicke Nevelfeller. De Nacht ward frischer as toletzt un dat Thermometer sackt op 9 bit 8 Graad op de Eilanden un an de Küst. In’t Binnenland op 3 bit 0 Graad. Dat kann ok Boddenfrost geven. Morrn erst verenkelt dicker Nevel, afsiets darvun fangt de Dag mit Sünnschien an. Dat ward dröög un faken fründlich bi 12 bit 14 Graad. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.