Plattdeutsche Nachrichten Plattdüütsche Narichten vun'n 6. Januar 2025

Öösterrik stüert op rechtspopulistisch föhrte Regerung to

Wien: In Öösterrik süht dat na en Regerungskoalitschoon twuschen de rechtspopulistsche FPÖ un de konservative ÖVP ut. Bunnspräsident Alexander Van der Bellen will doröver mit FPÖ-Baas Herbert Kickl snacken. De FPÖ hett de Parlamentswahl vör dree Maanden kloor wunnen. Bi dat Verhanneln över en Koalitschoon wullt aver eerst nüms vun den annern Parteien mit de Rechtspopulisten tohoop arbeiden. Na wekenlangen Drapen twuschen ÖVP, SPÖ un Neos is nu kloor dat de Parteien vun ehren Inhoolten her nich tohooparbeiden köönt.

Rechtsextreme Straafdaten sünd op den hööchsten Stand

Berlin: De Tahl vun Verbreken, de as rechtsextrem inornt warrt, nimmt to. Verleden Johr hett dat Binnenministerium en Hööchststand registreert. Alleen bet Enn November verleden Johr wurrn binah 34.000 Fäll registreert – en Plus vun tominns 17 Perzent lieköver dat Vörjohr. Meist weren dat Propaganda-Straafdaten, to´n Bispill straafschüllig Snacken in dat Internet. Aver ok Volkshetzung, Schaden an Saken un Gewalt tellen dorto.

Weniger as de Hälft vun Arbeiders geven bi de Arbeit ehr Best

Stuttgart: Nich mol jedeen tweete Anstellte gifft op de Arbeit sien Best. Dat is bi en Ümfraag vun de Prövens- un Beradenssteed EY rutsuert. Mit 48 Perzent liggt de Motivatschoon ünner den internatschonaalen Dörsnitt vun 54 Perzent. Noch weniger Lust hebbt dorna Arbeiders in Frankriek, den Nedderlannen un Japan. Mehr Motivatschoon gifft dat dorgegen in Indien, China un den USA.

Demi Moore winnt ehren eersten Golden Globe

Los Angeles: Verleden Nacht sünd de Golden Globes utgeven worrn. Een vun de wichtigst Film- un Fernsehprisen op de Welt. Hollywood-Star Demi Moor hett en Trophä as beste Hööftrullspelersche wunnen, dat weer ehr eerste Golden Globe. De mehrsten Priese hett mit veer Utteken de Musical-Thriller „Emilia Pérez“ wunnen. Nix kregen hett dorgegen de düütsche Koprodukschoon „Die Saat des heiligen Feigenbaums“.

„De Werser geiht“: An den Oosterdiek finnt wedder de Ieswetten statt

Bremen: An den Oosterdiek finnt an Middag wedder de traditschonelle Ieswetten statt. En Snieder, de mit en Plättiesen utstaffert is, pröövt of de Werser dichtfreert is. Siet velen Johren kummt dat sülvige dorbi rut, to´n letzten Mol weer de Werser 1946/47 an en poor Steeden mit Ies bedeckt. De Ieswett gifft dat siet 1828. Bi dat Ieswettfest warrn jedeen Johr Spennen för de Düütsche Sellschop to Redden vun Minschen mit Schippbröök sammelt.

Dat Weer

Un nu kiekt wi op dat Weer: In Bremen, Bremerhoben, Emm un Möppen hebbt wi överall ölben Graad. Hüüt Vörmiddag eerst Dröög mit en beten Sünn, an Namiddag kaamt vun de Ems her wedder dichte Wulken un Schuer ran. Dat Thermometer wiest us teihn Graad op de Eilannen un twolf bet veerteihn Graad in´t Binnenland. In de Nacht meist dicke Wulken, de Schuer trecken sik an de Noordsee torüch, man an morgen trecken nee´e Schuer in´t Binnenland op. An de Nordsee kann dat Regen, Grisselgrussel un Gewidder geven. Dat ganze bi fief bet veer Graad. Morgen kriggt wi en bunten Mix ut Wulken, en beten Sünn, Regen un Schuer, to´n Deel mit Grisselgrussel. An de Küst kann dat wiederhen Gewidder geven. Dat Thermometer wiest us fief bet söss Graad.

Dat weren de Plattdüütschen Narichten. Tohoopstellt vun Sven Weingärtner. Op platt torechtmaakt un vörleest vun Martina Brünjes.