Plattdeutsche Nachrichten Plattdüütsche Narichten vun'n 7. Januar 2025

Mehr as 100 Minschen doot bi Eerbevern in Tibet

Peking: Bi en Eerbevern in de chines’schen Region Tibet sünd mehr as 100 Minschen to Dode kamen. Mehr as 130 Minschen sünd versehrt worrn, as de staatlich Narichtenagentur Xinhua vermellt hett. Bavento sünd mehr as dusend Hüüs ramponeert worrn. Dat Bevern mit de Starkde 6,8 weer op de Noordsiet vun’n Mount Everest. De Reddungsarbeiden löppt opstünns wieter.

Noordkorea test nee’e Hyperschallrakeet

Pjöngjang: Na egen Angaven vun Noordkorea hett dat Testen vun en nee’en Hyperschallrakeet slumpt. De hebbt se al an’n Maandag afschaten. De Rakeet kummt 1.500 Kilometers wiet un weer twölfmal so gau as de Schall, as de staatlich Narichtenagentur KCNA vermellt. Dat nee’e Wapensystem schall na Menen vun’n Staatsböversten Kim Jong Un to’n nuklearen Afschrecken denen. Wegen de hogen Gauigkeit gellt Hyperschallraketen as besünners gefährlich.

ARD strahlt Satellitenprogrammen blots noch in HD ut

Berlin: All ARD-Fernsehprogrammen, de per Satellit utstrahlt ward, gifft dat vun hüüt an blots noch in HD-Oplösen. Dat Överdragen in leger SD-Qualitäät ward instellt. Grode Kabelnettbedrievers wüllt bi dat Afschalten ok mittrecken. Dat geiht üm dat Eerste as ok de drütten Programmen as Radio Bremen un NDR. Mehr as 90 Perzent vun de Huusholden, de de Programmen per Satellit kriegt, hebbt en HD-kumpablen Fernseher. Dor is dat Bild scharper un de Ton beter.

Bremer Senaat will Soziaalutgaven daalsetten

Bremen: De Bremer Senaat will de Soziaalutgaven in Bremen un Bremerhaben daalsetten. Dorför sett de Landsregeern en hoochrangig Spaarkommischoon mit söss Senaters in. Se schüllt de Rebeeten rutfinnen, in de Bremen besünners veel betahlt oder mehr utgifft as anner Städer in de Grötte. Hier schall in Tokunft spaart warrn. So kann womööglich de Stütt bi dat Ünnerbringen vun Flüchtlingen, aver ok in de Hölp för junge Lüüd oder in de Pleeg daalsett warrn.

Polizei un Füerwehr mit zig Insatzen wegen Storm

Bremen: De Storm in de Nacht hett in Bremen un Bremerhaben för zig Insatzen vun Füerwehr un Polizei sorgt. För de Landkreisen Cuxhaben, Osterholt un Bremerhaben hett de Füerwehr mehr as 30 Insatzen mellt. In Elsfleth is en Autofohrer dör en Boom swor versehrt worrn. In Groot Ippener hett sik de Fohrer vun en Motorruller swor versehrt, as em en Stormbö faatkregen un daalstött hett. Wegen den Storm sünd op veele Streken Töög utfullen. De leegste Deel vun’n Storm weer an’n laten Avend vörbi.

Dat Weer

Un nu en Blick op dat Weer: In Bremen un Leer 4, un in Bremerhaben un Cloppenborg sünd dat opstünns 5 Graad. Hüüt blifft dat blangen dichte Wulken un’n poor Regen- oder Grisselgrusselschuers an de Noordsee ok mal för längere Tiet dröög. Ok’n beten Sünnschien is mööglich. Vun Middag an verdeckt ok in’t Binnenland düüstere Wulken de Sünn, de ok Regen-, Grisselgrussel- oder Sneeschuers bringen köönt. An de Noordsee sünd ok korte Gewidder mööglich. Denn kann dat ok glatt ween wegen Matsch. Dat ward köhler as toletzt mit 5 bet 6 Graad. In de Nacht is dat mal mehr, mal weniger wulkig mit Regen- oder Grisselgrusselschuers, in’t Binnenland ok mit Sneeschuers. Later lockert dat ok mal op un blifft dröög. Dat Thermometer sackt daal op 3 bet 0 Graad, denn kann dat ok glatt ween wegen Snee. Morgen deelt sik Sünn un Wulken den Heven, un an de Noordsee sünd noch’n poor Schuers mööglich, ok mit Grisselgrussel oder Snee. Anners blifft dat dröög bi 4 bet 6 Graad.

Dat weern de Narichten op platt. Tohoopstellt hett se Sven Weingärtner. Op Platt trechtmaakt un vörleest vun Marc Gelhart.