Plattdeutsche Nachrichten Plattdüütsche Narichten vun'n 8. Januar 2025

Trump-Verlangen na 5 Perzent Afwehrutgaven kriegt Wind vun vörn

Berlin. Ut SPD un FDP kaamt Gegenwind to dat Verlangen vun den tokamen US-Präsidenten Trump an de Nato-Staaten. Trump will, dat de Nato-Lidmaten tominst fief statt betto twee Perzent vun ehr Bruttobinnenlandprodukt in de Afwehr steken. SPD-Butenpolitiker Stegner nööm dat Verlangen totale Unvernunft. En brukt nich mehr Wapen in de Welt sünnern weniger, see he to dat Narichtenportal „Politico“. De FDP-Politikersche för Verdeffenderen Strack-Zimmermann see to dat Redaktschonsnetwark Düütschland, man schull sick nich vun jedeen Utseggen vun Trump verrückt maken laten.

WirtscDusende Minschen bringen sick för Waldbran bi Los Angeles in Sekerheit

Los Angeles. In den US-Bunnsstaat Kalifornien gifft dat wedder en legen Waldbrand. Mehr as 30.000 Minschen in´n Westen vun Los Angeles mussen ehr Hüüs un Wohnungen verlaten.Dat vermellen de Behörden. En poor Hüüs wurren al tonichte makt. Op en poor Straten vun dat Stadtviddel Pacific Palisades geev dat en chaootsch Dörchenanner. Autos steken in´n Stau fest. Minschen stegen ut un brochen sick to Foot in Sekerheit. Dat Füer warrt vun düchtigen Wind anböötten un breed sik ut.

EU wohrschaut Facebook-Konzern Meta

Brüssel. De EU-Kommission wohrschaut den Meta-Konzern dorför, Faktenkuntrullen ok bi Facebook un Instagram in Europa wegfallen to laten. Wenn Meta ok in de EU nich mehr mit unafhängigen Faktenkontrollören tosamenarbeiden deit, drauhen den Konzern hoge Geldstrafen, so en Kommissionsspreker. Meta-Baas Zuckerberg harr güstern ankünnigt, de Tosamenarbeit mit Faktenkontrollören vun buten in den USA to Enn to bringen. In Tokunft schüllt dorför Anwenners de Mööglichkeit kriegen, verkehrte Utsagen or Utsagen, de in de verkehrte Richt wiesen, kenntoteken.

Een, vun den se meent, he kunn dor achter steken na mörderisch Schööt fastnahmen

Bad Friedrichshall. Na mörderisch Schööt in en Maschinenbofirma in´n Norden vun Baden-Württembarg hett de Polizei en möglichen Keerl, vun den se meent, he kunn dor achter steken, fastnahmen. Bi den Keerl hannelt sick dat, as de Polizei vermellt, üm en 52-jöhrig old Keerl, de in dat Ünnernehmen arbeiden hett. He schall güstern Namiddag mit en Mask in de Firma kamen ween un üm sick schoten hebben. Twee Mitarbeiters sünd dootbleven, en drütte Mitarbeiter is op Leven un Dood to Schaden kamen. De Achtergrünnvun de Daat sünd noch nich kloor.  

Bremen stellt Plan för Drinkwater vör

Bremen. Dat Land Bremen hett en Plan utklamüstert, üm de Drinkwaterversorgens in den tokamen Johrtheinten to sekern. Umweltsenatorsche Kathrin Moosdorf will de Plans an´n Middag vörstellen. De Stadt Bremen is meist op Drinkwater ut Neddersassen anwiesen. Bremerhaben dorgegen is mit sien Borns praktisch unafhängig. As dat Umweltressort vermellt, warrt de Waterverbruk in beiden Steden bit to dat Johr 2050 hooch gahn – wegen högere Inwohnertallen un wegen den Klimawannel.

Dat Weer

Un nu noch en Blick op dat Weer: In Emden dree, in Bremen-Mitt twee, in Bremerhaben dree un in Hooksiel sünd dat opstunns twee Graad. Vundag delen sick Sünn un Wulken den Heven. An de Nordsee sünd en poor Regenschuer ünnerwegens. To´n Deel mit Grisselgrussel vermengelert. In´n Verloop blifft dat dröög, hell un kloor. An´n Namiddag un Avend treckt de Heven mehr un mehr to. De Wind weiht in Maten bit frisch un stark in Böen vun de Süüdwesten Kant. Veer bit söss Graad stahn op dat Thermometer. In de Nacht is de Heven vull mit Wulken. Man dat blifft dröög. Vun de Nordsee trecken en poor Regenschuer op. De Temperaturen liggen bi minus een bit plus dree Graad. Morn bringen dichte Wulken to´n Deel Nevel un in´n Verloop en poor Sneeflocken or en beten Sneefall. Dat kann glatt ween. In Richt Oostfreesland kann ok mal de Sünn dör de Wulken kieken. Vun de Nordsee trecken Schuer op. To´n Deel mit Grisselgrussel. Dat Thermometer wiest een bit fief Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.