Plattdeutsche Nachrichten Plattdüütsche Narichten vun'n 20. Januar 2025

Trump ward in’t Amt inföhrt

Washington: Donald Trump ward an’n Avend na us Tiet to’n tweten Mal den Eed as Präsident vun de Vereenigten Staaten afleggen. Na sien Antrittsreed in’t Kapitol treckt Trump mit sien Froo in de traditschonellen Präsidentenparaad na’t Witte Huus hen. He övernimmt dat Amt vun den Noch-Präsident Joe Biden.

Israel un Hamas laat Geiseln free

Gaza: Israel hett 90 Palästinenser freelaten, de achter de Trallen weern. Na Angaven vun de palästinens’schen Autonomiebehöörd hannelt sik dat dorbi üm Froenslüüd un Ünnerjohrige. Tovör hett de islamistische Hamas eerste israeelsche Geiseln freelaten.  

Rieke Lüüd ward jümmer rieker

Davos: Dat Geld un Goot vun Milliardären wasst na en Bericht vun de Entwicklungsorganisatschoon Oxfam jümmer gauer. In’n Snitt ward’n poor dorvun elkeen Dag üm twee Millionen US-Dollar rieker. De Tall vun Milliardären op de heelen Welt is na Utkunft vun Oxfam in’t verleden Johr üm 204 op meist 2.800 anstegen.

Perzess wegen versöchten Dootslag in Bremerhaben

Bremen: An’t Landgericht hett en Perzess wegen versöchten Dootslag anfungen. Vör’t Brett steiht en 31-Johriger. Em drauht nu en Straaf vun fief Johr achter de Trallen. He schall in’n August in Bremerhaben-Lehe en Mann so dull schubst hebben, datt de mit den Achterkopp opslahn un sien Hart stahnbleven is. Em hebbt se dorna wedder in’t Leven trüchhalen musst.

Bremer Literaturpries ward vergeven

Bremen: De Schrieversmann Wilhelm Bartsch ward an’n Middag in’t Bremer Raathuus mit den Bremer Literaturpries 2025 uttekent. Dat is een vun de ollsten un bedüdensten Literaturpriesen in Düütschland. Övertüügt hett Bartsch de Priesrichters mit sien Gedichtband „Hohe See un niemands Land“. Den Förderpries kriggt Stefanie Sargnagel för ehren Romaan „Iowa – Ein Ausflug nach Amerika“.

Dat Weer

Un nu en Blick op dat Weer: In Bremen un Bremführ -3, in Cuxhaben un Leer -2, in Bremerhaben -1, un op Borkum sünd dat opstünns 0 Graad. Hüüt is de Heven dicht wulkig, ok mit hogen Daak. An’n Vörmiddag is dat to’n Deel dakig, un hier un dor kann dat ok glatt ween. De Sünn is blots hier un dor af un an to sehen bi -1 bet 2 Graad. In de Nacht is de Heven wieterhen vull mit Wulken un hogen Daak. Hier un dor is dat dakig. Meisttiets blifft dat dröög. An de Noordsee kann dat mal’n beten pieseln. För korte Tiet funkelt aver ok mal de Steerns an’n Heven bi 0 bet -3 Graad. Morgen is dat toeerst hier un dor dakig. Över Dag hollt sik noch veele Wulken, aver dat blifft meisttiets dröög. Hier un dor kummt ok mal för korte Tiet de Sünn ruut. De Temperaturen liggt bi 1 bet 3 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.