Plattdeutsche Nachrichten Plattdüütsche Narichten vun'n 22. Januar 2025

US-Präsiden Trump künnigt groet KI-Projekt an un drauht mit Töll

Washigton. US-Präsident Donald Trump hett den Anfang vun en groten Projekt to de Brägenplietschmaschin ankünnigt. Tominnst 500 Milliarden Dollar schüllt in neje KI-Rekenzentren in den USA lopen. Vör allen betahlt vun dree Technologie-Konzernen. Bavento drauht Trump de Europäisch Union wedder mit Straaftöll. De EU is bannig slecht to us, see Trump, dorüm muss se mit Töll reken. Dat is de eenzige Weg, üm Gerechtigkeit hen to kriegen.

Angreep op Kapitol in Washigton – Trump-Begnadigte kamen free

Washigton. Mehr as 200 Verordelte sünd wegen den Angreep op dat Kapitol vör veer Johr middewiel freelaten wurren. Dat vermellen amerikanisch Medien. Alltohoop wurren vun US-Präsident Donald Trump in düssen Tosamenhang binah 1.500 Minschen kort nadem he sien Amt övernohmen hett begnadigt. Dorünner ok grode Liddmaten vun rechtsextremen Gruppen. Liddmaten vun de demokratisch Parteien reageren vergrellt un sproken vun en Ingefohrbringen vun de amerikanisch Demokratie.

Tall vund e Doden na Hotelbrand in de Törkei stiegt an

Kartalkaya. Na dat Füer vun en groden Ski-Hotel in´n Noorden vun de Törkei is de Tall vun de Doden op 76 hoch gahn. Vun 52 wurren betto de Naam rutfunnen. Se sünd all törksch Staatsbörger. Mehr as 50 Minschen sünd to Schaden kamen. Dat Füer bluck vörletzt Nacht op, den Grund weet se noch nich. De Behörden hebbt negen Minschen fastnahmen, dorünner den, de dat Hotel tohöört.

Nu een för allemal: Bremen sett de Afgaven för Schausteller hoch

Bremen. De Stadt sett de Afgaven vun de Schaustellers för Oosterwiese, Freimarkt un Wiehnachtsmarkt rop. De Stadtbörgerschaft hett de vun den Senat besloten Ännerung vun de Gebührenordnung mit den mehrsten Stimmen vun root-gröön-root tostimmt. De Oppositschoon ut CDU, FDP un Bündnis Düütschland stimmten all tohoop dorgegen. Vör allen Krögers un Bedrieven vun Eten schüllt in Tokunft düütlich mehr Geld betahlen. An düsset eerste Hoochsetten siet twölf Johr föhrt kien Weg vörbi, so Wirtschaft-Staatsraatsche Maike Frese. Se wies op de Inflatschon un de anstegen Kosten hen.

Handball WM: Eerste Nedderlaag för DHB-Mannschaft

Herning. De düütsche Handball-Natschonalmannschaft hett bi de WM in Däänmark dat eerste Mal verloren. Gegen Mit-Gastgever Däänmark stunn dat an´t Enn 30 to 40. Liekers kann Düütschland noch in dat Viddelfinaal vun de Weltmeisterschaft kamen. Dorto brukt de Mannschaft morgen en Sieg gegen Italien.

Dat Weer

Un nu noch en Blick op dat Weer: In Rodenborg Wümm minus dree, in Bremen-Mitt minus twee, in Bremerhaben minus een un in Nordholt sünd dat opstunns minus dree Graad. Vundag fangt dat mit Nevel un Sünnschien an. In´n Dagsverlop treckt de Heven mit Wulken to. An´n Namiddag fangt dat twüschen Ems un Weser an to regen. An´n Avend breed sick de Regen ok in´n Oosten ut. De Wind weiht en beten. An de Küst in Maten vun de süüden Kant. Dat Thermometer wiest twee bit fief Graad. In de Nacht kann man nich de Stern an´n Heven sehn. Dat kaamt de ganze Nacht natt vun baven. An´n fröhen Morgen kann ok Sneeregen fallen. Een bit dree Graad stahn denn op dat Therometer. Morn wedder vele Wulken. Wenn de Regen aftrocken is, kann de Sünn hier un dor dör de Wulken kieken. An de Nordsee noch enkelte Schuer. An´n Avend fangt dat wedder an to pladdern. De Temeperaturen liggen bi veer bit söss Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.