Plattdeutsche Nachrichten Plattdüütsche Narichten vun'n 17. Januar 2025

Tostimmen to Wapenroh in Gaza un Freelaten vun Geiseln

Tel Aviv – De letzten Steens, de in’n Weg legen hebbt för een Wapenroh in’n Gaza-Krieg, sünd wegrüümt. Dat hett dat Büro vun Ministerpräsident Netanjahu vermellt. Se sünd sik eenig worrn över dat Freelaten vun de Geiseln, de in de Gewalt vun de islamistische Hamas sünd. Nu schall dat Sekerheitskabinett tohoopkamen. De Regeern ward achterna Raat hollen un „Jo“ to dat Afkamen seggen.

Regeern verdeffendeert Utstieg ut de Atoms

Berlin – Bunneskanzler Scholz un Wertschuppsminister Habeck hebbt in’n parlamentarischen Ünnersökensutschuss verdeffendeert, wat se to’n Utstieg ut de Atoms besluten hebbt. Scholz sä, dat se entscheden hebbt, de letzten AKW goot dree Maand länger an’t Nett to laten, weer richtig wesen. De Kanzler weer de letzte Tüüg, de in’n Atom-Ünnersökensutschuss befraagt worrn is. Bit Midde Februar schall een Afsluss-Bericht vörleggt weern.

Musk-Rakeet explodeert bi Testflug

Washington – Dat Weltruumünnernehmen SpaceX hett sien Starship-Rakeet bi een Testflug verloorn. De Rakeet weer erst mit Erfolg afhoben, denn sünd aver woll nacheenanner de söß Driefwarke utfullen. De Starship-Rakeet schull vun Texas ut över den Gulf vun Mexiko flegen un darbi de Welt bold ümrunnen.

Lange Reeg vun Militärfohrtüüg ünnerwegens

Bremen – In Neddersassen un Bremen sünd vundaag un morrn vele Reegs vun britischen Militärfohrtüüg ünnerwegens. Je rund 100 Fahrtüüg fohrt vör allens op Autobahnen un Landstraten. Se wüllt na Tschechien, dar is een Militäröven plaant. De Reegs sünd üm un bi een Kilometer lang. Wokeen jem in’n Verkehr in de Mööt kummt, schall Afstand hollen, wenn’t geiht, un ok nich twüschen de verenkelten Fohrtüüg fohren.

Füer in Wahnhuus in Bremerhaben

Bremerhaben – In’n Stadtdeel Lehe hebbt Füerwehr un Polizei in de Nacht een Füer in een Mehrfamilienhuus doot maakt. 26 Bewahner mussen middewiel dat Huus verlaten, versehrt worrn is nümms. In’t Treppenhuus hebbt een Kinnerwagen un Müll Füer fungen. Woso, dat weet se noch nich.

Dat Weer

Un nu een Blick op dat Weer: in Bremen un Deefholt minus 1, in Bremerhaben plus 1 un op Wangerooge sünd dat opstunns plus 2 Graad. Vundaag gifft dat faken veel Neven or Hoochnevel, dat is egens överall dröög – man oplockern deiht dat meist nich - bi 1 bit 4 Graad. Tokamen Nacht treckt wedder allens mit Nevel to, man Regen fallt meist nich. Dat ward in’t Binnenland överall frostig kold, dat Thermometer sackt op minus 2 bit minus 4 Graad, an de Küst op plus 1 Graad. Dat kann glatt weern. Morrn fangt de Dag mit Wulken un Nevel an un dat is meist överall dröög. To’n Namiddag hen riet de Wulken vun Süden her op un af un an kann de Sünn rutkieken – bi 2 bit 4 Graad. Sünndag na veel Nevel faken Sünnschien un dröög, bi 3 bit 5 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.