Plattdeutsche Nachrichten Plattdüütsche Narichten vun'n 27. Januar 2025

Steinmeier fohrt na de Gedenkfier in’t KZ Auschwitz

Auschwitz-Birkenau: Dat is 80 Johr her, dat dat NS-Kunzentratschoonslager Auschwitz freekamen is. Dorum holt se dor an’n Namiddag en Gedenkfier af. Dorbi ween warrt Minschen, de dat Lager överleevt hebbt, un ok vele Staatsbesökers ut anner Länner. Mit dorbi ok Bunnspräsident Fank-Walter Steinmeier un Bunnskanzler Olaf Scholz. De Reden warrt Minschen holen, de dor in’t Kaschott inseten hebbt. In dat KZ Auschwitz sünd twüschen 1940 un 1945 mehr as ene Millionen Minschen dootmaakt worrn.

Kunferenz vun de Binnenministers: Wat kummt na Aschaffenborg

Bremen: Wo bi en Attack mit en Metz in Aschaffenborg twee Minschen to Dode kamen sünd, snackt de Binnenministers vun Bund un Länner vunnamiddag doröver, wat dorna kummt. Se versammelt sik digital. Inlaadt hett Bremens Binnensenater Ulrich Mäurer. Opstunns hett Bremen dat Leit bi de Binnenministerkunferenz. Bi de Attack mit en Metz verleden Middeweken weren en Jung vun twee Johr un en Mann to Dode kamen. Maakt hett dat woll en Mann vun 28 Johr ut Afghanistan, de egens ut Düütschland harr utreisen musst.

EU-Butenministers snackt över weniger strenge Regeln för Syrien

Brüssel: De Butenministers vun de EU-Staaten hebbt sik in Brüssel an een Disch sett. Se snackt doröver, wat se de Strafen un Oplagen för Syrien to’n Deel trüchnehmen köönt. Dat hangt dormit tohoop, dat verleden Dezember de Assad-Machtapparat dor ut’t Amt jaagt worrn weer. De dor nu dat Leit hebbt, schüllt de Drift kriegen, dat se in Syrien en Demokratie opboot.

Lüüd ut den Öffentlichen Deenst övergeevt List mit Unnerschriften

Bremen: In den Tarifstriet vun den Öffentlichen Deenst övergeevt Mitarbeiders ut Bremen an’n Vörmiddag en List mit Unnerschriften an Finanz-Staatsraat Martin Hagen. De Gewarkschap Verdi seggt: Sowat 3.000 Minschen hebbt dat unnerschreven. Se verlangt: De Senat schall jem Stütt geven. Ok in Bremerhaven warrt Unnerschriften övergeven.

Nordwestbahn fohrt mit Bus

Ollenborg: Lüüd, de laat an’n Avend, in de Nacht un fröhmorgens mit de Nordwestbahn RS3 un RS30 fohren wüllt, mööt sik dor op instellen, dat twüschen Ollenborg un Bremen un op dat Stück Ollenborg-Bad Twüschenahn de Bahn nich fohrt, dorför aver de Bus unnerwegens is. Dat hett de NordwestBahn anseggt. De Düütsche Bahn will de Strecken dor nakieken. Dorför bruukt se bet Middeweken.

Dat Weer

Un woans süht dat mit dat Weer umto ut? Opstunns hebbt wi in Achem 7 Graad, in Bremerhaven sünd dat 8 un in Bremen un Leer 9 Graad. Vundaag: Vele Wulken un eerst regent dat ok noch. Över Dag lockert dat vun’t Emsland her op, denn waagt sik ok de Sünn mal rut, un dat blifft ok mal en Stremel dröög. Schuern kann dat liekers, mag ween, ok mit Blitz un Dunnerslag. Dat Thermometer krabbelt op 8 bet 12 Graad. De Wind dorto weiht in Maten oder en beten mehr, an de See un op de Inseln deegt un mit störmsche Böen, he dreiht vun de süüdoosten na de süüdwesten Kant. Tokamen Nacht: Mal treckt lockere Wulken dör, mal kloort dat op. Hier un dor ok dichtere Wulken, meist överall aver blifft dat dröög. Bi 6 bet 4 Graad. Morgen: Eerst hell un kloor, denn aver treckt vun Holland her dichte Wulken ran, un de smiet twüschen de Ems un de Werser ok en beten Natts vun baven. Dat Ganze bi 8 bet 11 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.