Plattdeutsche Nachrichten Plattdüütsche Narichten vun'n 28. Januar 2025

SPD wohrschaut: Brandmuer na de AfD nich fallen laten

Berlin: In de SPD mellt sik mehr Stimmen, de dor nich mit inverstahn sünd, dat de CDU-Baas Friedrich Merz Andrääg to de Inwannerungs-Politik wenn’t nich anners geiht ok mit Stütt vun de AfD dörbringen will. De Ministerpräsidenten un -präsidentinnen vun de söven SPD-Länner hebbt in en Breef an jümehr Kollegen vun de Union un de Grönen wohrschaut: De Brandmuer twüschen de demokraatschen un de undemokraatschen Parteien dröff nich fallen. Merz, he will för de Union Kanzler warrn, harr seggt: Wenn de Bunnsdag düsse Week över‘t Inwannern afstimmt, denn kummt em dat dor nich op an, wat de AfD dorför is oder nich.

Dänemark will mehr Militär na de Arktis schicken

Kopenhagen: Dänemark will mehr Militär na de Arktis schicken. US-Präsident Donald Trump harr dörblicken laten, he wörr Grönland mit siene velen Rohstoffen geern övernehmen. Dat däänsche Verteidigungsministerium hett nu anseggt: Se warrt sowat twee Milliarden Euro utgeven för Kriegsscheep un Satelliten to’n Utspioneren.

Postbüdels streikt

Bremen: In Bremen un Bremerhaven warrt vundaag vele Breven nich utlevert. Wat dor achter stickt, is en Warnstreik in de Verdeler-Punkten vun de Düütsche Post. De Gewarkschap Verdi hett dorto opropen, in de grötteren Städte in all Bunnslänner. So wüllt se mehr Druck bi’t Uthanneln vun de Tarifen maken. Verdi verlangt 7 Perzent mehr Geld un mehr Urlaubsdaag. De Düütsche Post seggt: Dor is dat Geld nich för dor.

Leitersch vun de Grundschool an de Stader Straten kummt woll nich trüch

Bremen: De Leitersch vun de Grundschool an de Stader Straten, de ut ehr Amt rutnahmen worrn weer, kummt woll nich wedder trüch. Dat hett buten un binnen vun Öllern höört. Dat lett: De Steed warrt nee utschreven un denn bet to’n Sommer nee besett. Öllern un Schoolmitarbeiders harrn in en apen Breef schreven: De Schoolleitersch harr dorför sorgt, dat vele an de School bang weren.

Gewalt an School in Sande – Polizei un Schoolbehöörd fraagt na

Sande: An de Oberschool Sande in Freesland is dat woll mehrmals to Gewaltakschonen twüschen Schölerinnen kamen. In de Nordwest-Zeitung steiht to lesen: Ene Schölerin is nu so slaan un pett worrn, dat se na’t Krankenhuus müss. Bloot weer ehr in dat Hirn rinlopen, un de Lungen hebbt ok wat afkregen. Dat geiht woll ut vun en Koppel vun Deerns twüschen 13 un 14. De Schoolbehöörd un de Polizei wüllt Licht in de Saak bringen.

Dat Weer

Un woans süht dat mit dat Weer umto ut? Opstunns hebbt wi in Bremen un Weyerbarg 5 Graad, in Kneten sünd dat 6 un in Bremerhaven 7 Graad. Vundaag: Eerst noch hell un fründlich mit en Handvull lockere un dünne Wulken. Gegen Middag treckt vun Westen her mehr Wulken ran, de twüschen Ems un Werser hier oder dor en beten Natts daalsmiet. Meist aver blifft dat dröög. Vun de Sunn kriegt wi aver nich veel to sehn. Dat Thermometer krabbelt op 7 bet 10 Graad. De Wind dorto weiht flau oder en beten mehr vun de süden bet süüdoosten Kant, in Oostfreesland un an de See ok frisch. Westlich vun de Werser ok mit deegte Böen. Tokamen Nacht: Mal mehr, mal weniger Wulken, un vun de Ems treckt Regen in’t Land. Bi 7 bet 5 Graad. Morgen: Eerst dichte Wulken, de Regen mitbringt. Gegen Middag treckt de aver na de Elv un de Noordsee af. Achteran jümmers noch vele Wulken, wenig Sunnschien un ok mal en Schuer. Dat Ganze bi 7 bet 9 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.