Plattdeutsche Nachrichten Plattdüütsche Narichten vun'n 29. Januar 2025

Bunnsdag snackt över Asylpolitik

Berlin. In den Bunnsdag geiht dat an´n Namiddag üm Towannern un Asyl. Eerstmal gift Kanzler Scholz en Regerungs-Verkloren af. Bavento hett de Union twee Andrääg to en strenger Migratschonspolitik un to de binnerste Sekerheit inbrocht. CDU un CSU wüllt ünnern annern Lüüd, de Asyl söökt, heel un deel afwiesen, överall Grenzkuntrollen inföhren un Lüüd, de ut Düütschland utreisen mööt, achter Trallen schicken. SPD un Gröne stellen ruut, de Plaans wörrn gegen dat Grundgesetz un europäisch Regeln verstöten.

Postmitarbeiters op´t Land leggt Arbeit daal

Berlin. In Neddersassen kriegen vele Minschen vundag kien Post. De Gewarkschop Verdi hett de Mitarbeiters to noch en Warnstreik opropen. Bedrapen sünd bunnswiet al Gegenden op´t Land. De Stadtstaaten sünd dorvun nich bedrapen. Al güstern hebbt de Tostellers in Grootsteden streikt. Verdi verlangt söven Perzent mehr Geld un dree Dag mehr Urlaub un noch en Dag för Gewarkschoplidmaten. De Düütsche Post meent, düsset Verlangen is nich to betahlen.

Kennteken vun nitratbelasten Gegenden nich rechtens

Lümborg. De aktuell Methode vun de Düngevörschrift in Neddersassen, Gegenden de mit Nitrat belast sünd, kenn to teken, is nich rechtens. Dat hett dat böverste Verwaltensgericht fastleggt. Woll is dat in´n Groten un Ganzen möglich, sone Gegenden uttowiesen, in de Buern weniger düngen dörven. Dat vermellt dat Gericht. Düsse, as de nöömt warrt, „roden Gegenden“ sünd in Neddersassen aver mit Fehlers rutfunnen wurren. En poor Buern harrn gegen düsse Regeln klaagt.

Runde Disch för de Bildung drapt sick eerstmals in Bremen

Bremen. In Bremen kaamt an´n Namiddag to´n eersten mal de „Runde Disch för de Bildung“ tosamen. Dorto hett Bilungssenatorsche Sascha Aulepp Vertreder ut Scholen, Sellschop, Wirtschaft un Politik inladen. Bi dat Drapen schall dat, as de Bildungsbehöörd vermellt, üm de Themen Schangsengleichheit, Bildungshülp un mögliche Investitschonen gahn. Dat Ressort hett to den Runden Disch op Druck vun verscheden Lüüd ut de Bildungslandschop inladen.

Polizei in Bremen prövt mögliche Serie na Angreep op Shishabar

Bremen. Na den Överfall mit Wapen op en Shishabar in Bremen mit dree Versehrten, prövt de Polizei mögliche Tosamenhäng to vörigen Straafdelikten rund üm de Bar. In´n Juli geev dat vör dat Lokal in de Groden Johannistraat en Striet twüschen twee grötteren Koppeln. De Polizei funn dorna Inschusslöcker in de Schiev. Vör veer Weken dörsöchen Polizisten de Bar na en Klopperee un Metzenstekeree in den Neestadt-Wallanlagen.

Dat Weer

Un nu noch en Blick op dat Weer: In Cuxhaven un in Bremen-Mitt söven, in Bremerhaben un in Nordholt sünd dat opstunns söss Graad. Vundag fangt dat mit dichten Wulken un Regen an. An´n Middag un fröhen Namiddag trecken de Regenschuer över de Nordsee un Elv af. Dorachter kriegen de drögen Afsnidden de böverste Hand un de Wulken lockern op. Hier un dor kann dat noch en beten Natt vun baven kamen.  De Wind weiht en beten bit in Maten vun de süüden Kant. De Temeperaturen liggen bi söven bit negen Graad. In de Nacht wesseln sick Wulken mit Oplockerungen af. Enkelte Schuer sünd ok noch möglich. In´n Verloop vun de Nacht treckt de Heven ganz to. To´n Morgen fangt dat wedder an to regen. Fief bit dree Graad stahn denn op dat Thermometer. Morn blifft de Heven vull mit Wulken. Vun´t Ollenborger Münsterland breed sick de Regen bit to de Elv ut. Dröög blifft dat wohrschienlich in Oostfreesland. Vun dor lockern ok de Wulken to´n Avend op. Dat Thermometer wiest söss bit acht Graad. Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.