Plattdeutsche Nachrichten Plattdüütsche Narichten vun'n 30. Januar 2025

Fleger un Helikopter rasselt över Washington tohoop

Washington – In de US-Hauptstadt is güstern Abend een Fleger afstört. As dat Luftfohrtamt vermellt, weer de lüttje Maschien bold an’t Lannen, as se mit een Militär-Helikopter tohooprasselt is. Beid sünd in den Stroom Potomac stört. An Bord vun’n Fleger weern 64 Minschen, in‘n Helikopter dree. Redderslüüd weern de hele Nacht mit velen Lüüd in’n Insatt. Se hebbt aver noch nümms funnen, de överleevt hett.

Hamas hett noch mehr Geiseln övergeven

Gaza – Na bold 16 Maand in de Gewalt vun de Hamas sünd noch mehr Geiseln an dat Rode Krüüz övergeven worrn. Ünner de Minschen, de hüüt freelaten worrn sünd, schüllt ok twee Dütsch-Israelis sien, een 29-Jöhrige un een 80-Jöhriger. Buterdem fief Thailänder, de ut Israel entfört worrn sünd. Darför schüllt 110 Häftlinge ut Palästina ut israelschen Kaschotts free kamen.

Börgermeister Bovenschulte smitt Union Tabu-Bröök vör

Bremen – Börgermeister Bovenschulte hett Union un FDP in’n Bunnesdag vörsmieten, dat se een Tabu broken hebbt, wat dör nix to rechtfardigen is. He bekrittelt, se harrn bi dat Afstimmen över een scharpere Asylpolitik mit Afsicht de Stimmen vun de AfD hennahmen un darmit vun een Partei, de in Delen för seker rechtsextrem is. Darbi harr CDU-Kanzlerkandidat Merz in de verleden Maand jümmer wedder een Tohooparbeiden mit de AfD utsloten, so Bovenschulte.

Bi’n Runnen Disch is nix rutsuert

Bremen – De erste Runne Disch to de Bilden is güstern Abend to Enn gahn, ahn dat dor wat rutsuert is. All Littmaten hebbt sik darop eenigt, bestimmte Themen in lüttjeren Kreisen wieter to besnacken. De Bremer CDU hett den Optakt bekrittelt, se rekent nich darmit, dat se gau op een Brett kamen ward. Ok de Gesamtschölervertreders sünd nich tofreden: se harrn twars goot miteenanner snackt, aver dar is keen Vörslag för een Weg bi rutkamen.

Booarbeiden behinnert Togverkehr twüschen Bremen un Bremerhaben

Bremen – Booarbeiden behinnert vun hüüt Abend an den Togverkehr twüschen Bremen un Bremerhaben. Bedrapen is de Nordwestbahn as ok de RegioExpress vun de Dütsche Bahn. Bit Mondag fröh ward verenkelte Verbinnungen dör Busse ersett, aver blots vun’n späten Abend bit in den fröhen Morrn.

Dat Weer

Un nu een Blick op dat Weer: in Bremerhaben 4, in Bremen un Deefholt 5 un op Wangerooge sünd dat opstunns 6 Graad. Hüüt hollt sik meist dicke Wulken un vun’t südliche Emsland un Ollenborger Münsterland her breedt sik Regen bit to de Elv hen ut. An’n ehsten dröög blifft in Deelen vun Oostfreesland un in’t Cuxland. De Regen treckt na Südosten un an de Nordsee lockert de Wulken to’n Abend hen een beten op. Mag ween, un de Sünn kiekt denn noch mal kort rut – bi 6 bit 7 Graad. Tokamen Nacht treckt de letzte Regen af un dat lockert vun de Nordsee her wieter op. Man dat kann jümmer noch mal natt vun baben kamen. För de meisten geiht de Nacht aver dröög vörbi. Dat Thermometer sackt op 4 bit null Graad. Morrn wesselt sik Sünnschien un dicke Wulkenfeller af un dat is meist dröög bi 5 bit 7 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.